علا غانم باكية على الهواء: اتعمل عليا حفلة ضرب من ستات ورجالة تبع زوجي وحياتي في خطر

دخلت الفنانة علا غانم، في نوبة بكاء على الهواء، بسبب زعم تعرضها للعنف والقهر والطرد من منزلها على يد زوجها وعدد من الأشخاص المجهولين.

صرخات علا غانم بعد الهجوم على منزلها
وقالت الفنانة علا غانم باكية، خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "mbc مصر":" يوم الجمعة بعد الصلاة فجأة لقيت أحد الخفر بيندهلي وبيقولي فيه ناس كتير بيقولوا أنهم تبعك، طلعت بسرعة أشوف مين الناس دي طلعت علي البلكونة لقيت ناس كتير وعربيات كتير وستات، وقالولي أفتحي عندنا حفلة وعندنا تنضيف، ابتدين اقولهم هطلب البوليس لإنهم بدأوا يدفعوا البوابة، فجأة لقيت واحد اسمه محمد حسين كان بيشتغل مع جوزي زمان وبيقول إيه يا علا أفتحي الباب وبيكلمني بطريقة حقيرة فقلت له اتكلم بأدب وأنا بطلب البوليس وبدأت أصرخ وفجأة لقيت ناس غريبة دخلت، فلقيت زوجي ومعاه الشخص ده وحاولوا يفتحوا البوابة علشان يدخلوا الناس وضربوا الخفر بتوعوا وبقيت أصرخ ومنهم واحد مسكني من الروب وبيحدفني زي الكورة، فجأة البيت كله دخله حوالي 20 شخص ستات ورجالة، أنا ساكنة في المريوطية، وبعدين مش ملاحقة الناس واقتحموا البيت".

الاعتداء على علا غانم
وأكملت:"الستات حاولوا يكتفوني وبعدين جريت علي أمي، وجوزي اللى رافعة عليه قضية خلع، كانوا بيحاولوا يمكنوه من البيت والستات خدوا مني موبايلي وكتفوني وهو مسح الفيديوهات الخاصة بالكاميرات، البيت ده بيتي من سنة 99 من قبل ما اشوفه واتجوزه، أمي اتضربت بالشوم قدامي من جوزي، وجاء البوليس بعد فترة واحنا كنا في الجنينة وهو جوا البيت، وحكيت لهم القصة كلها وبعد نص ساعة روحنا على قسم الشرطة وفجأة لقيت كل الناس اللى اتهجموا عليا مشيوا، ولما طلعنا علي القسم قالولي انتى صاحبة الشوم ده فقلت له لأ دا هما اللى اقتحموا بيتي".

محضر علا غانم ضد زوجها
وأضافت علا غانم:"عملت محضر فيه وقالولي لو متصالحتوش انتي وأمك هتقعدوا لتاني يوم، وهو بيقول إن بيتك كبير ممكن يعيش في جزء منه علشان زوجك، فقلت لهم ده مش زوج وأنا رافعة عليه قضية خلع، فرفضت التصالح وبعدين فتحوا التحقيق وفضلت في النيابة لحد تاني يوم الصبح، وأنا مروحة مشيت 10 متر من القسم لقيت اللى شغالين في البيت بيصرخوا وبيقولوا أن فيه ناس ملثمين اقتحموا البيت وخرجوهم منه وضربوهم، فرجعت تاني علي القسم ونزلوا معايا قوة وهو كان جوا ومعاه ناس مسلحة وبيقول محدش للناس اللى معاه محدش يضرب نار، أنا دلوقتي مشكلتي مش البيت انا خايفة علي نفسي وأمي، هو دلوقتي في بيتي، وانا في حتة تانية، هو احتل البيت مع الناس اللى رموا عليا مولوتوف، أنا روحت لكل الناس والموضوع حاليا عند المحامي العام وأنا منتظرة الرد ومحكمة الأسرة كانت المفترض تحكم من شهر بس هو رد المحكمة، أنا بقالي في القضاء من 2018 عايزة انفصل عنه مش عارفه".

منشور علا غانم
علا غانم، قالت الفنانة علا غانم بأنها تتعرض للعنف والقهر ومهددة بالطرد من منزلها وطلبت الاستغاثة من المركز القومي للمرأة.

وقالت الفنانة علا غانم من خلال موقع إنستجرام: استغاثة للمركز القومي للمرأة الدكتورة مايا مرسي، أنا الفنانة علا غانم أتعرض للعنف والقهر والطرد من منزلي وأتعرض للمؤامرة وبلطجة وتهديد لي ولأسرتي بالكامل أغيثوني.
محامي علا غانم وعبدالعزيز لبيب يكشفان تفاصيل الخلاف بين الفنانة وطليقها
زوج علا غانم يرد على اتهامها له بالضرب وطردها من المنزل
وكانت قررت محكمة الأسرة بقصر النيل، تعليق دعوى الخلع المقامة من الفنانة علا غانم ضد زوجها عبد العزيز لبيب رجل الأعمال، وذلك للضرر ووجود خلافات زوجية بينهما لحين الفصل في طلب الرد.

دعوى خلع علا غانم
وكان المستشار عاصم قنديل، أقام دعوى خلع موكلته الفنانة علا غانم، بمحكمة الأسرة بقصر النيل ضد زوجها، وذلك للضرر ووجود خلافات زوجية بينهما.
ونقدم لكم من خلال موقع (فيتو)، تغطية ورصدًا مستمرًّا على مدار ال 24 ساعة ل أسعار الذهب، أسعار اللحوم ، أسعار الدولار ، أسعار اليورو ، أسعار العملات ، أخبار الرياضة ، أخبار مصر، أخبار اقتصاد ، أخبار المحافظات ، أخبار السياسة، أخبار الحوداث ، ويقوم فريقنا بمتابعة حصرية لجميع الدوريات العالمية مثل الدوري الإنجليزي ، الدوري الإيطالي ، الدوري المصري، دوري أبطال أوروبا، دوري أبطال أفريقيا، دوري أبطال آسيا ، والأحداث الهامة