"حوار المعزول" الممنوع نشره بناء على أمره

بعد تفكير عميق قررت أن أتحدى نفسي وأذهب إلى مرسي الريس المعزول بأمر الشعب وبيني وبين نفسي تخيلت أن يكون مرسي سايب دقنه وشعر رأسه منكوش وشبه منهار والسبحة في يده ورافع يده للسما وشغال يدعو على الشعب الذي عزله أو يستغفر ربه على ما ارتكبه في حق شعب مصر وأن هذه فرصة عظيمة في التقرب إلى الله ولكن ما وجدته يذهب العقل أن المعزول كان يرتدي ترنج سوت وكوتش رياضي ماركة اميجو اللي بينور ومبسوط قوي "اسم الله عليه" وكل شويه يبص على الكوتش ويضحك بينور.
وأمامه تليفزيون 36 بوصة بناءً على رغبته ليشاهد مسلسلات رمضان واكتر مسلسل عاجبه الزوجة التانية وحينما رآني
وقف مكشرا ضاربا الكف بالأخرى وصرخ أنت عايز مني إيه الحكم وتركته. والقصر وحرمنتني منه. والحراسة وراحت. والعز وأكل الوز كان حلما جميلا. وصرخ مرة تانية أنت عايز مني إيه فهمني؟
يا أخي سيبني في حالي. ويرفع يديه إلى" فوق "وبصوت عالي يارب خدني خلي الشعب يرتاح بقى.
وبعد أن يهدأ يجلس يقول يا أخي تصدق إني مرتاح منكم ومن الجماعة والعيال ودوشة الشعب.
أنا كده مية فل وعشرة ويضحك تعرف أن أحلي حاجه إني لو طلبت لبن العصفوره يجيني والرجالة ما شاء الله في ثواني يجبوه هما دول المصريين وقت الشدة يبان معدنهم.
خد عندك يا سيدي يعني مثلا إمبارح نفسي راحت على البوظة هموت عليها لقيت الرجالة باسم الله ماشاء الله بعد الفطار كانت عندي وهات يا شرب لما الواحد داخ وهات ياضحك أصل البوظة دي حاجة جامده قوي وبعد البوظة يا معلم نفسي راحت على البلوظة وهات يا معلم لاقيت نفسي مش عارف نفسي وقعدت أنادي يا "مرسي" يا" بديع" يا" بلتاجي" ليلتكم بوظة متغمسة بلوظة.
سألته ايه حكاية التليفزيون ده؟
ضحك يا خويا انت واخد بالك مني قوي ومركز معايا ابدا يا سيدي طلبت تليفزيون وجاني ومتابع مسلسلات رمضان وأحلى مسلسل داخل دماغي قوي " الزوجه التانيه" عمرو عبد الجليل عامل دور حلو قوي بيفكرني بالشاطر حبيب قلبي وفيه شوية برامج مقالب حاجة حلوه تخلي الواحد يعيش له يومين بقى ها هاها.
سألته وبرامج السياسة والتوك شو؟
هرش منخيره ياعم روح هي ناقصة نكد أنا كده مريح دماغي ومظبط والمزاج عنب.
طيب ينفع اعمل معاك حوار؟
بعد تفكير ماشي أنا موافق وضحك ومن غير شروط كمان.
أنا دلوقتي ولأول مرة مش مستني التعلميات. يعني صاحب قرار ها.
سألته أنت زعلان؟
تعرف اني فعلا زعلان عشان سمعت كلامهم وصد قتهم.
وأقول لنفسي كان مالي أنا بس ومال الموضوع ده.
يا عم انا من أولها احتياطي واستبن بس الشاطر وبديع هما اللي ورطوني وضحكو عليا.
وقعد يضحك اصلهم شربوني عصير رومان مخلوط بعصير مشمش وأنت عارف الرومان بيعمل ايه ولا المشمش على ها ها ها.
سألته ايه رايك في اعتصام رابعة؟
مط شفايفه وانا مالي هما أحرار لكن "وقرب مني" هياخدو حتة صابونه إنما ايه عجب يا معلم.
قلت له لكن معتصميى رابعة منتظرينك يا معلم ؟
يا حبيبي أنا قلت لحد اعتصم. طيب اديت ميعاد لحد في رابعة ولا النهضة محصلش. يبقي الموضوع تضييع وقت يعني من الآخر كده الموضوع كبير علينا. واحنا فتحنا صدرنا على الفاضي وعملنا فيها أبو السبع رجاله.
وعمل حركة بشفايفه.
سالته وايه كمان ؟
ده فيه مصيبه الناس مش عارفاها أن البلد كان ليها 15 ريس كل مكتب الارشاد كانت تحكم مصر انا كنت بنفذ وبس انا في الصورة مش اكتر حتي لما اسافر بره كنت بتصل عشان اخد التعلميات.
قلت له وبعدين ؟
قال بس يابرنس انا دلوقتي عايش عيشة الملوك وزى الفل.
طب أقولك على سر والله أنا دلوقتي مرتاح لا مرشد. ولا الشاطر. ولا العريان. ولا البلتاجي.يا راجل ده انا ارتحت منهم كلهم يا ساتر اسكت يا راجل أصعب حاجة أنك تبقي لا مؤاخذة.
قلت له يعني لو خرجت دلوقتي تروح فين؟
متعجبا ليه هو أنا عملت حاجة وحشة أنا مبسوط كده أهم حاجة عندي "البوظة" "والبلوظة "وبعد كده تبقي هيصه يا معلم ها ها ها وسلم لي على رابعة.
سألته أنت ندمان على حاجة؟
أيوه المفروض كان بعد القعدة في القصر كان سجنت بوز الإخص البلتاجي والمرشد والشاطر ومكتب الإرشاد كله لكن النصيب بقى.
قلت له أنت صايم؟
صرخ متعجبا يا راجل الحمد لله وبفطر" بوظة" كل يوم.
لكن نفسي افطر على مائدة الرحمن بتاعة فيفي عبده بيقولوا عليها إنها فايف ستار يا معلم.
سألته انت زعلان من اوباما ؟
لا هو ممثل كويس زي عمرو عبد الجليل في" الزوجه التانيه" كلمني امبارح قلتله خلص ياعم سيبك من التمثيل احنا هنمثل على بعض.
سألته بتابع اللي بيحصل في رابعه ؟
ضحك مش كتير بس هي مسرحية حلوه قوي زي مسرحية "عش المجانين" بتاعة شفيق يا راجل اللي لما يكون عطشان يشرب وكله بياكل عيش يا معلم.
سألته طيب انت عايز مني حاجه ؟
مسك في هدومي أبوس على ايدك أوعى تنشر الحوار ده والنبي أنا عايز اربي عيالي.
سألته ليه ده انت فل وكلامك زي الفل ؟
قال ما أنا عارف بس بعد نشر الحوار الإخوان هتهدر دمي.
يرضيك أموت فطيس يرضيك؟
واعطاني كوبا من "البوظه" وبعد ما شربت قلت له بس يا معزولتي لو عرفت ماشي لكن لو كبير الفشارين ولد شاهين أصر على النشر يبقي حظك كده صح يا معلم ؟
مط شفايفه لقدام وقال ولا يهمني انشر يا عم طالما البوظة معايا مش مهم.
فليسقط الحوار وتحيا "البوظة" اللي تخلي "القطة" أسد همام وانتهي الحوار!