مناخوليا.. شيرين وحسام وأنا وانت | ساخرون

بص شوف حسام بيعمل إيه.. بص شوف شيرين خايفه عليه.. خايفه عليه من عيون الناس.. هو الحب هو الإحساس.. شيرين خلاص شربت م الكاس.. أما حسام يا وعدى عليه

مناخوليا اجتماعية من النوع رفيع المستوى.. إذا ما توقفت عندها فستكون كفيلة بأن تاخذك إلى هنا حيث عنبر العقلاء داخل مناخوليا العباسية وبالتأكيد ستلقى منا كل الترحيب فنحن ابدا لم ولن يشغلنا ما يحدث خارج سرايتنا الصفراء
أما المحللون والجهبزيون خارج السرايا فراحوا ينشرون صور للفنانة شيرين اثناء عقد القران وكلا منهم يقول للآخر "شوف الصور كدا وقولى شايف إيه".. فيتفتق زهن العباقرة عن أن شيرين تفعل ذلك مضطرة وتحت ضغوط لا يعلمها إلا هى.. ويذهب آخر إلى ان حسام ماسك عليها زلة بيهددها بيها علشان كدا هى دايما تحت طوعه.. ويضيف أرجحهم عقلا أن عيون شيرين فى الصورة وارتباكها وفركها لأيديها ينم عن عدم رضاها لما يحدث خاصة أن أهلها مش موافقين ولا بناتها وعارفه انها خسرت كل اللى حواليها وانها عامله حاجه غلط ثم ينهى فزلكة ام اللى جاب أبوه بدعاء رقيق ليختم به البوست أو التغريده قائلا: ربي يجيب العواقب سليمه يارب.. شيرين غلبانه وبناتها غلابه وأمها رجل فى الدنيا ورجل فى الآخره.. ربنا يهدىها

كل دا بيحصل على السوشيال ميديا أرض الخزعبلات ومنبع المناخوليا مع إن صوت شيرين العالى وضحكاتها المجلجله وتغزلها فى حسام على الهواء مباشرة اثناء مكالمتها مع عمرو أديب يؤكد أنها في كامل قواها العقليه.. ويشير إلى أن عمرو أديب عارف هى عايزه إيه.. ويؤكد أن حسام حبيب عارف نفسه بيعمل فيها وفينا إيه.. وبص شوف حسام بيعمل إيه.. إسم الله عليها وإسم الله عليه!