النص الكامل للتحقيق في جمع ربة منزل بين زوجين في المقطم.. المتهمة: زوجي طلقني وردني واتجوزت عليه.. والضحية: صاحبي اتجوز مراتي

حصلت فيتو علي نص التحقيقات الكاملة في قضية اتهام ربة منزل في المقطم بالجمع بين زوجين.
وجاء في نص أقوال المتهم الأول ويدعي "عبد المنصف. أ" التي أجرتها النيابة العامة كالتالي
س: ما قولك فيما هو منسوب إليك من أنك متهم بالاشتراك مع المتهمة نفيسة. ح في ارتكاب جريمة الزنا بأن قمت بمعاشرتها معاشرة الأزواج بناء علي الاتفاق والمساعدة ؟
ج: الكلام ده محصلش
س: ما الذي حدث إذا وما هي طروف ضبطك واحضارك وعرضك علينا؟
ج: اللي حصل ان انا وعبد النبي اقارب وبعد كده حصل خلافات بينه وبين مراته نفيسة ومشيت وسابته والكلام ده كان في شهر فبراير اللي فات وانا كنت ساعتها بدور عليها بس ملقيتهاش وبعد كده اخت نفيسة المدعوة ام هاشم كلمتني في التليفون وقالتلي ان نفيسة عندها وبعد كده في شهر مارس اللي اسمه شحات كلمني وقالي تعالللنا البيت في المقطم ولما روحلته وراني قسيمة طلاق نفيسة من زوجها عبد النبي وقالولي ساعتها اتجوزها انت واكتب عليها عرفي عشان عبد النبي ما يخدش الاولاد منها واتجوزتها واجرتلها الشقة اللي هي قاعدة فيها دلوقتي ببلوك 187 مساكن العبد بالمقطم وامبارح كنت قاعد عند ام هاشم في بيتها جنب الشقة اللي انا مأجرها لنفيسة اللي قاعدة فيها ولقيت النجدة جاية تاخدني من عندها وودوني علي القسم عملولي محضر وجيت دلوقتي النيابة.
س: متي وأين حدث ذلك؟
ج: الكلام ده حصل نهار 22 يوليو 2022 الساعة 2 صباحا بمساكن العبد في المقطم
س: من كان برفقتك آنذاك؟
ج: انا كنت قاعد مع ام هاشم وشحات جوزها
س: ما القائم بضبط وما عددهم وما أسمائهم ؟
ج: اثنين امناء شرطة ومعرفش اساميهم
س: هل ثمة علاقة او خلافات بينك وبين القائمين علي ضبطك؟
ج: انا معرفهمش ولا يوجد بيني وبينهم اي خلافات
س: ما تعليلك اذا لإلقاء القبض عليك؟
ج: علشان عبد النبي قالهم انه هو زوجها مش انا
س: متي حدثت واقعة زواجك من المدعوة نفيسة؟
ج: انا اتجوزتها في شهر مارس
س: هل كنت علي علم بأنها ما تزال متزوجة من عبد النبي؟
ج: لا أنا مكنتش اعرف إنها لسه علي ذمته
س: من هو القائم علي إبلاغك بذلك تحديدا؟
ج: اللي بلغني بالكلام ده أم هاشم أخت نفيسة وجوزها شحات
س: هل من ثمة شهادة قيد طلاق لديك؟
ج: هي مش معايا
س: وأين هي شهادة قيد الطلاق انفة البيان؟
ج: الورق كله مع شحات
س: ما هي ظروف تقابلك مع المتهمة نفيسة؟
ج: انا عرفتها بحكم إنها زوجة عبد التنبي قريبي
س: متي واين كان ذلك تحديدا؟
ج: انا اتعرفت عليها من سنتين لما جت مع عبد النبي الأقصر
س: ما الذي اخبرك به كل من أم هاشم وشحات زوجها تحديدا؟
ج: هما قالولي ان عبد النبي طلق نفيسة ووروني شهادة طلاق وقالولي اتجوزها انت
س: هل من ثمة عقد زواج بينك وبين نفيسة؟
ج: ايوه ومرفقة بالمحضر
س: متي واين قمت بالزواج من المدعوة نفيسة؟
ج: انا اتجوزتها في شهر مارس اللي فات في المقطم
س: هل من ثمة شهود علي ذلك الزواج؟
ج: ايوة هشام وواحد تاني اسمه صلاح
س: اين كنت تقيم فترة زواجك من المدعوة نفيسة؟
ج: انا كنت عايش معاها في الشقة اللي اجرتهالها في مساكن العبد بالمقطم
س: ما قولك فيما محضر الاستدلالات المؤرخ بتاريخ 22 يوليو 2022 الساعة 7 صباحا والمحرر بمعرفة أمين شرطة حاتم عطية بقسم شرطة الخليفة ؟
ج: الكلام ده محصلش
س: وما تعليلك اذن وقد قمت بالتوقيع علي المحضر؟
ج: هما قالولي امضي فمضيت
س: ما قولك فيما شهد به المدعو عبد النبي. م ؟
ج: الكلام ده محصلش
س:هل ثمة خلافات بينك وبين عبد النبي؟
ج: هو قريبي من بعيد ومفيش بيني وبينه اي خلافات
س: ما تعليلك لما قرره عبد النبي؟
ج: انا معرفش هو بيقول ليه كده
س: ما سبب تواجدك في محل الواقعة تحديدا؟
ج: انا كنت قاعد سهران معاهم
س: هل تم ضبطك في قضايا مماثلة من قبل؟
ج: لا
س: هل لديك سوابق جنائية؟
ج: انا معنديش سوابق
س: هل لديك اسم شهرة؟
ج: انا معنديش اسم شهرة
أقوال المتهم الثانية
وجاء في نص أقوال المتهمة الثانية وتدعي نفيسة. ح "29 سنة "
س: ما قولك فيما هو منسوب إليك من أنك متهمة بارتكاب جريمة الزنا بالاشتراك مع المتهم عبد المنصف. أ ؟
ج: الكلام ده محصلش
س: ما الذي حدث إذن وما هى ظروف ضبطك وإحضارك وعرضك علينا؟
ج: اللي حصل ان حصل خلافات بيني وبين إخوات زوجي وبعد كده سبت الأقصر في شهر فبراير اللي فات علشان ابعد عنه وجيت القاهرة اقعد عند اختي ام هاشم بمساكن المقطم ولما كنت قاعدة عندها قالتلي هي وجوزها شحات ان جوزي عبد النبي طلقني وطلعولي قسيمة طلاق ووروهالي وبس أنا مش بعرف اقرا ولا اكتب وبعدين قالولي مين هيخلي باله منك ومن عيالك ويصرف عليكو وقالولي اتجوز عبد المنصف علشان ياخد باله مني ومن عيالي وبعد كده اجرلي شقة في بلوك 178 مساكن العبد وفي شهر يونيو اللي فات قابلت عبد النبي في رمسيس واعطاني فلوس وطلعت معاه فندق ومش فاكرة اسمه وساعتها عاشرني معاشرة الأزواج وبعد كده سبته ورجعت عند اختي وامبارح اتفاجئت بعبد النبي بيخبط علي بابا الشقة بس انا مكنتش اعرف انه هو اللي بيخبط مرضتش افتحله ولما كلمت اختي قالتلي صوتي ولمي عليه الناس وبعد كده لقيت الحكومة بتخبط علي الباب ففتحتلهم ونزلت وروحت معاهم علي بيت اختي وبعد كده اهدوني انا ومنصف بعد ما جاب عقدين الجواز العرفي اللي احنا كاتبينهم وودونا القسم.

س: متي واين حدث ذلك؟
ج: الكلام ده حصل بتاريخ 22 يوليو 2022 الساعة 2 صباحا في المقطم
س: من كان برفقتك آنذاك؟
ج: انا كنت في الشقة لوحدي ومعايا ولادي الاثنين واسمهم عمر وحمدي
س: ما تعليلك بالقبض عليك؟
ج: انا معرفش هم قبضوا عليا ليه
س: متي حدثت واقعة طلاقك من المدعو عبد النبي؟
ج: اختي وجوزها وروني قسيمة الطلاق في شهر فبراير اللي فات
س: من هو القائم علي إبلاغك بها تحديدا؟
ج: اختي وجوزها
س: هل من ثمة شهادة قيد طلاق لديك؟
ج: انا معرفش مين الشهود
س: هل تقابلك مع زوجك الاول عبد النبي؟
ج: ايوه انا قابلته في شهر يونيو اللي فات
س: هل قام سالف الذكر بمعاشرتك معاشرة الأزواج عقب علمك بطلاقه لك ؟
ج: ايوه
س: ومتي وأين حدث ذلك؟
ج: الكلام ده حصل في شهر يونيه اللي فات في فندق رمسيس معرفش اسمه
س: ما تعليلك لقيامك بذلك وانت علي علم بطلاقه لك؟
ج: علشان اختي وجوزها أجبروني علي كده
س: ما الذي اخبرك به كل من شقيقتك وزوجها؟
ج: هما قالولي روحي قابلي عبد النبي لما اتصل بيا اروح اشوفه
س: متي وأين قمت بالزواج من المدعو عبد المنصف
س: انا اتجوزته في شهر فبراير اللي فات
س: اين كنت تقيمين فترة زواجك من عبد المنصف
ج: عبد المنصف اجرلي شقة اللي انا عايشة فيها دلوقتي
س: وما هي ظروف تقابلك مع عبد المنصف؟
ج: انا اعرفه علشان هو قريب عبد النبي وانا كنت قاعدة مع عبد النبي في الأقصر
س: وهل قام زوجك عبد النبي بتطليقك؟
ج: ايوه
س: وهل الطلاق بائن ام رجعي؟
ج/ بائن
س: وهل تم الطلاق رسميا علي يد ماذون؟
ج: ايوه كان رسمي علي يد ماذون
س: وهل قام زوجك عبد النبي بردك؟
ج: ايوه
س: وهل تم الرد رسميا علي يد ماذون؟
ج: ايوه هو ردني رسمي عند ماذون
اقوال الزوج الضحية
وجاء في نص أقوال المبلغ ويدعي عبد النبي. م " 41 سنة" أمام النيابة العامة.
س: ما معلوماتك بشأن الواقعة؟
ج: اللي حصل اني متجوز المدعوة نفيسة من سنة 2012 وبعد كده في سنة 2014 طلقتها رسمي عند مأذون ورديتها بعدها ب 3 ايام عند الماذون برضو ومن سنتين رحنا الاقصر وفي شهر فبراير اللي فات حصل بين نفيسة واخواتي البنات خلافات وساعتها اخدت الاولاد ومشيت وسابتلي البيت وفضلت اتصل بيها مردتش عليا ولما معرفتش اوصلها كلمت قريبي عبد المنصف.أ قالي ان اولادي مشيوا من البلد ومش قاعدين في الأقصر وبعدها اتصلت بناس كتير في البلاج وكلهم قعدوا يقولولي اني اسال عبد المنصف علشان هو اللي عارف مراتي نفيسة فين وبعدها اتفقت مع عبد المنصف يحاول يكلمها وقالي انه معرفش يوصلها وبعد كده اتصل بجوز لاختها وقالي ان جوز اختها قاله انه مشفهاش وبعدها عبد المنصف سافر من الاقصر وراح القاهرة في منطقة مدينة نصر وروحتله واتقابلنا يوم 6 مارس 2022 وساعتها قولتله يرن عليها وقعد يقولي انها مش هترد وبعدها راحت متصلة هي بيه وقولتله افتح ومبعد ما رد رحت واخد التليفون منه وكلمتها وقولتها انتي عملتي ليه كده قالتلي كله بسبب اخواتك البنات ومن اسبوع خطيب بنت اختها اتصل بيا وقالي ان مراتي وعبد المنصف قاعدين في شقة في المقطم ومتجوزين عرفي وقالي روحلهم لو عاوز عيالك ومصدقتهوش وبعد كده افتكرت انها اتصلت بيا من تليفون غريب قبل كده ولما اتصلت بيه عرفت عنوانه ولما روحتله العنوان اللي اتوصفلي في بلوك 87 مساكن العبد في المقطم ولما وصلت اتصلت بيها قولتلها اطلعيلي عشان ابعتلك فلوس علي فودافون كاش وبعد كده قالتلي مش هاعرف انزل وبعد كده لقيت بنتين صغيرين واقفين في الشارع ناديت عليهم ووريتهم صورة اولادي فقالولي ايوة دول ساكنين هنا في العمارة في الدور الثاني الشقة اللي عليها باب حديد وقالولي انهم عايشين مع ابوهم وامهم وبعد كده طلعت وخبطت سمعت صوتها ومرضيتش تفتح وبعد كده خبطت جامد ومرضيوش يفتحوا وبعدين عرفت من الناس في الشارع ان في واحد نط من البكونة فوق الكشك اللي تحت البلكونة ونزلت والناس اللي في الشارع قالولي انه جري وفضلت اجري وراه لحد ما دخل في بيت اختها ام هاشم وقولتها تطلعه ومرضيتش وبعد كده قالتلي اني بتهجم عليها في بيتها وقلتلها لو انا فعلا بتهجم عليكي كلمي النجدة تيجي تاخدني وبعد كده جوز اخت مراتي اللي اسمه شحات اخدني ونزلنا روحنا الشقة اللي مراتي فيها ودخلنا وبعد كده طلبنا النجدة وعملنا محضر

س: ما سبب ومناسبة تواجدك ؟
ج: انا روحت هناك بعد ما عرفت ان الرقم اللي هي طلبتني منه لسوبر ماركت فقلت اكيد قريب من المكان اللي هي قاعدة فيه
س: هل من ثمة رفيق كان معك؟
ج: لا انا لما طلعت وخبطت علي الشقة لقيت الناس بتصوت في الشارع وبتقول في واحد نط من البلكونة
س: هل شاهدت تلك الواقعة؟
ج: انا مشفتهوش وهو بينط بس انا لما نزلت الناس قالتلي هو جري من الناحية دي وجريت مكان ما هما شاوروالي
س: وهل قمت بتطليق زوجتك؟
ج: ايوه طلقة واحدة من سنة 2014
س: وهل الطلاق بائن ام رجعي ؟
ج: الطلاق كان رجعي
س: وهل تم الطلاق رسميا علي يد ماذون؟
ج: ايوه
س: وهل قمت برد زوجتك؟
ج: ايوه
س: وهل تم الرد رسميا؟
ج: ايوه
س: وما تاريخ ردك لها؟
ج: بعد ما طلقتها بثلاثة أيام
س: وهل عقب ردك لها كانت تقيم معك؟
ج: ايوه كانت عايشة معايا من 2014 لحد شهر فبراير اللي فات
س: وهل تخلل تلك الفترة التي اقامت معك بان قمت بمعاشرتها؟
ج: ايوه
س: ومتي تمت آخر معاشرة زوجية بينكما؟
ج: كانت في شهر يونيه في فندق برمسيس
س: وهل علمت بالواقعة عقب تلك المعاشرة الأخيرة؟
ج: ايوه انا عرفت بعدها
س: هل شاهدت زوجتك وشريكها أثناء ارتكابهما الواقعة؟
ج: لا انا خبطت علي باب الشقة بس هما مفتحوليش
س: ما هو التصرف الذي بدر من؟
ج: نزلت لما سمعت صوت الناس بتقول ان في واحد نط من البلكونة من الدور الثاني وجريت في الاتجاه اللي قالولي عليه
س: هل كانت العلاقة الزوجية قائمة حال ارتكاب تلك الواقعة من زوجتك؟
ج: ايوه هي لسه علي ذمتي
س: ما دليلك علي ارتكاب زوجتك تلك الواقعة؟
ج: انا لما روحت القسم عبد المنصف طلع عقدين جواز عرفي وقالهم انه متجوزها وانا اساسا مش مطلقها
س: أين تم ارتكاب تلك الواقعة؟
ج: هي كانت عايشة معاه في العنوان اللي انا روحتلهم فيه
س: هل بينك وبين المتهم شريك زوجتك ثمة علاقة أو خلافات؟
ج: لا هو صاحبي وابوه يبقي ابن عم ابويا ومفيش بيني وبينه أي خلافات