بدأت أحب الوزارة أوي.. أوي

بالرغم من أن "الببلاوي" بيه لسه جديد في موضوع تشكيل الوزارة ده.. إلا أنه واضح كده ومن أول وزير.. أنه راجل فاهم وصاحب مزاج وبيختار بدقه شديدة.. آه يعني بالقلم والمسطرة.
يعني التاريخ هيشهد أنه لأول مرة يبقي عندنا وزيرة إعلام.. إعلامية.. آه والله إعلامية.. يعني تكنوقراط آهه.. لا وكمان ست زي القمر.. يعني ما فيش نفسنة بقي ولا شغل من ده.
التاريخ بيسجل زي ما سجل كده أن حتشبسوت كانت ملكة وعازفة الهارب مرسومة على جدران المعابد.. أن واحدة ست ومش أي ست.. عازفة "فلوت" شايفين والنبي الرقة؟! فلووووت.. قولوا الكلمة تاني معايا كده.. ورئيسة دار الأوبرا المصرية تبقي وزيرة.. يعني راجل موفر ماشي بمبدأ من "دقنه وافتله" واهه فعلا جحا أولي بوزارة ثقافته وليه نجيب ناس غريبة من برة.
وكله كوم بقى ووزير البحث العلمي "المرشحة" اللي أنا باتمني كل يوم تفوز بامتياز.. دي كوم تاني.. دي هتغير مفهوم الستات المصريين بالمرة..
مهندسة.. مهندسة دي ولا مش مهندسة يا سي مرسي.. واحنا اللي كنا بدأنا نحس أن الهندسة دي على إيدك هتخلي البني آدم بيحدف طوب وزلط.. شايفين الجمال والرقة.. مش مصدقة نفسي.
ووزيرة الصحة.. دكتورة برضه.. مما أوضح أن السيد رئيس الوزراء مش بس بيعطي فرصة ذهبية لعصر النساء أن يعود بقوة
لا ده كمان هيحبب الناس في البحث العلمي و"العيا" صراحة أنا لو عندي وزيرة صحة زي دي.. أتمنى كل يوم أروح أي مستشفى هي موجودة فيها.
وعلي فكرة بقى مش قصدي ع الستات بس.. لا ده كمان الوزارة فيها الأستاذ كمال أبو عيطة اللي بقاله كتير أوي بيناضل عشان حق العمال.. أخيرا بقى بقالهم وزير منهم.
أنا بعد سنتين من العذاب وواحد يأذن في البرلمان يخض الأعضاء والتاني عايز يلغي الإنجليزي والتالت قرر فجأة أن الباليه لازم يتلغي ويرجعنا 50 سنة ورا.. ورؤية "أم أيمن" كابسة على نفس البرلمان والست "باكينام" ناطة علينا في الشاشة كل يوم.. ما كانش عندي أمل نشوف مصر فيها ستات تاني.. لكن أنا حبيت الوزارة الجديدة دي أوي أوي أوي !