مؤتمر" اللي ورا عمر سليمان" يثير جدلا على "تويتر".. أشرف: "مادة" لحلقة باسم يوسف الأسبوع القادم .. خضير: أطالب بمحاكمته بتهمة ازدراء المخابرات العسكرية المصرية.. محمود: تخيل ده الذكي اللي فيهم

سكت دهرًا ونطق كفرًا.. هكذا بدا اللواء حسين كمال، مدير مكتب عمر سليمان، رئيس المخابرات المصرية السابق، فهذا الرجل الذي صمت كثيرًا، وأطلق عليه النشطاء لقب "الراجل اللي واقف ورا عمر سليمان"، خرج عن صمته وقرر عقد مؤتمر عالمي ليكشف فيه مخططات الإخوان، ويفصح عن المعلومات التي لديه.. انتظره الكثيرون أمام الشاشات ليسمعوا الجديد منه، ولكن على عكس المتوقع، جاء المؤتمر مثيرًا للضحك والسخرية، وهو الأمر الذي رأى نشطاء موقع "تويتر" أنه مادة جيدة لباسم يوسف في حلقته القادمة، فيما طالب آخر بتقديمه للمحكمة بتهمة ازدراء المخابرات المصرية.. وكانت من ضمن التعليقات ما قاله "أحمد رمضان": "الله يسامحك يا عم الحاج. خليت اللي كان ناوي ينزل يوم 30 تتسد نفسه.. و يموت من القهر".
وأضاف:"عمرو عفيفي": "الناس اتعرفت عليه وهو صامت.. وهزقته لما اتكلم.. الناس برضه.. هزقته إنت حمار ياحمار".
وتابعت"بنت بلادي": "مؤتمر الراجل اللي كان ورا عمر سليمان دلوقتي بس عرفت ليه النظام السابق كان هش وسقط أمام ثورة علشان فيه عقليات زي دي".
وكتب "أشرف خضير": "أفتكر باسم يوسف مش هيلاقي مادة لحلقة الأسبوع الجاى أكتر من عبقري المخابرات ده".
وأضاف: "وبتقولوا على حسني كان عميل إسرائيل؟ طب يعمل إيه الراجل إذا كانت مخابراته بتفتح المندل وتضرب الودع".
وتابع: "أطالب بمحاكمة الراجل اللي كان ورا عمر سليمان بتهمة ازدراء المخابرات العسكرية المصرية".
وأوضح "بلال بسيوني":"مؤكد!! الراجل اللي كان ورا عمر سليمان هو إللي كاتب فليم "مهمة في تل أبيب". بطولة نادية الجندي... عبقري عبقري يعني".
وأضاف "شريف": "الإخوان عرضوا على عمر سليمان يبقى رئيس بس بشرط يسمع كلامهم نرد عليك ونقول: ( الصحافة فين العبيط أهو)".
وعلق "برادعي افتراضي": "الآن فقط استوعبنا كلمات مرسي الهزيلة 56734 والحارة المزنوقة، فقد كان يخاطب عقول المخابرات ومن على شاكلتها".
في حين قال "محمد عبد الله": "إديني عقلك اللواء حسين كمال فلول من ساسه لرأسه لأنه كان مدير مكتب العقل المدبر ل"المخلوع" يدعو للنزول 30يونيو تبقى دي مش برضه ثورة فلول".
وتابع "مايكل ويلسون": "مؤتمر اللواء حسين كمال إلى الآن لم يضف جديدا. أمال إيه ياعم هتكشف حقائق دي ما كنت تقول تعقيبا على مجريات الأحداث. لا وكمان مؤتمر عالمي!!!".
وقال "محمود عاطف": لك أن تتخيل ده تربية عمر سليمان يعنى الذكى اللى فيهم امال الباقى عامل إزاى هههههه".
وعلق "محمود مهدي": "إلى المخابرات الإسرائيلية: اللى حصل دة خدعة إحنا جامدين قوي على فكرة بس بنخاف من الحسد".