اللّى بنى مصر

«الكنال»
مَزّق جسم العجز وتوب الليل
مزّق كوابيس الأحلام
مزّق كل كلام يتقال ما فيهوش الحق
سِن سنانك.. إيدك وأيادى الملايين
سِن الكلمة النّغمة المكنة الفاس
الدايرين في قلوب الناس
زي استعدادك للحب
استعدادك للتضحية
مش بالسهل نحمي كَنَالْنَا
ونؤكد معنى الحرية
مشروع سطو كئيب مشبوه
يقطع... يفصل مصر ياهوه
مطلوب إن المصرى يتوه
ولا يبقاله وجود وحدود
لو يمشى ما يعرفشى يعود
في مخطط تدمير ماشيين
وكنالنا بايعين بايعين
اكتب... زوّر.. امضى .. صوّر
خطط خمسين اتفاقية
أعادينا وشوشها بتتغيّر
لِبْسِت ماسكاتها القطرية
ضاع عبد الناصر ونضاله
ضاع شهداء ودماهُم سالوا
وتاريخ أمَّه .. فَرْح وغُمَّة
ووطن بيودّع أبطاله
بعد ما ودّع بدري عيالُه
مَزّق جسم العجز وتوب الليل
مزّق كوابيس الأحلام
مش راح يهنى لمصر منام
إلا أمّا يعودوا لشقوقهم
وننكسّ عَلَمْ الآلام