إرهابيو سيناء يحصلون على "أوسكار" أحسن خطف!

فى الفضاء الافتراضى لا حواجز تمنع الساخرين والمضحكاتية من السخرية من أى شىء وكل شىء.. هنا نرصد قفشاتهم ونكاتهم وآراءهم الجريئة اللاذعة.
«نشكر الرئيس محمد مرسي راعي الخطف والمخطوفين في مصر».. هكذا علق شباب «فيس بوك» علي عملية تحرير الجنود علي غرار فيلم عادل إمام «مرجان أحمد مرجان» ، العملية التي وصفت بالسرية - رغم نشر جميع الفضائيات أخبارها- قوبلت بتعليقات ساخرة علي موقع التواصل الاجتماعي فيس بوك.. «فيتو كافيه» رصدت تعليقات الشباب..
سلمى عنايت: أحد الجنود المخطوفين: طبعا الحمد لله ولله الحمد، أنا باشكر كل اللي ساعدنا على اللحظة الهايلة دي والإنجاز التاريخي ده.. والفضل طبعا يرجع لباور فاميلي.. وماننساش جهود السيد الرئيس راعي الخطف والمخطوفين في مصر..
بسمة عبد الغفار: المتوقع أنه يطلع بيان كمان شوية من الرئاسة يقول إن اللي كانوا خاطفين الجنود في سينا.. مختلين عقليا..
تهاني الرويني: نهار داخلي.. حجرة المعيشة.. صوت أغانٍ وطنية شغالة بالتليفزيون..
الحاجة: إيه دا هما رجعوا المخطوفين؟..
أنا: إيوه يا حاجة رجعوهم من شوية كدا..
الحاجة: طب وعملوا إيه مع اللي كانو خاطفنهم؟...
أنا: أخدوا أوسكار أحسن خطف!
نبيل الكامل: كده مش ناقص غير حفلة تكريم للجيش والشرطة.. ومحمد ثروت يغني لمرسي ويبقى تم الاستنساخ بنجاح..
ثامر محمدين: المفروض بعد تحرير الجنود دا، طلائع الجيش تاخد 3 نقاط زيادة في الدوري..
أحمد همام: عزيزى المرحوم عبد الحليم حافظ .. تحية طيبة وبعد..
بعد الأشواق والتحيات أحيطك علما قبل ما تعرف من بره إن الإخوان على قناة مصر 25 مشغلين أغنيتك «عاش اللى قال للرجال عدوا القنال» مصحوبة بصورة للأخ مرسى وهو بيصافح الجنود العائدين من الخطف.
صلى على النبى يا عندليب في قبرك وماتنفعلش.. أنت راجل صاحب عيا..
محمد كرم: العيال بعد كدة مش هاتلعب «عسكر وحرامية».. هايلعبوا «عسكر وجهادية «..
معتز السواح: سؤال بريء.. هو ليه من ساعة ما العساكر اتخطفوا ما سمعناش حد من الإخوان بيقول اغضب يا ريس؟!..
محمد فخر الدين: في رد فعل سريع للغاية.. أبو إسماعيل لخاطفي الجنود: حملة تمرد عار على البلاد..
فارس علام: دي مش سينا... دي دولة لازقة فييينا..
غادة الجيار: أنباء عن تعيين سفير الفاتيكان ذات نفسه قائما بأعمال سفارة مصر بسيناء الشقيقة..