بالفيديو.. قصيدة "مين بيجرح؟!" ل شاعر الرصيف حمدى إمام

كنت فيها
وسط موجة.. وسط هوجة من البشر
وسط كلمة وناس زى المطر
والتلامذة من معاهد والمدارس
كنت حاسس بالخطر
كل كلمة بألف نبضة
بألف قبضة من الشعور
والهتاف زى الهدير
سد ف ودانى رج اعصابى وكيانى
كل شعرة سودة شابت
لما كل الهوجة قالت
يابلادى.. يابلادى
في الحقيقة
كنت خايف
كنت شايف
من ورا الموجة العتية حية
تعبان بألف حية
إيه ده إيه ده.. مين ح يهدى
الطوب بيتحدف مطر
آه ياقلبى ع القزاز اللى اتكسر
غطى الشوارع
والبوليس دخل يدافع
عن بلاده
البوليس قدام ولاده
آه ياقلبى لما اشوف اللى انجرح
صحبى زميلى أو أخويا أو أبويا
آه يابلدى كل طوبة بتترمى بتشق قلبى
طب ياريتها بس تبعد عن ببانك عن حيطانك
لا كفاية عليكى جرحك مستحيل تنجرح تانى
ومين بيجرح؟!
دول ولا دك دول ضناك
اللى رضعوا الخير في صدرك
واللى شايلاهم لمهرك
والبلد بترد لا
ألف لا
مش ولادك