«أبو إسماعيل لا نجوتش»

فى الفضاء الافتراضى لا حواجز تمنع الساخرين والمضحكاتية من السخرية من أى شىء وكل شىء.. هنا نرصد قفشاتهم ونكاتهم وآراءهم الجريئة اللاذعة.
كعادته يتصدر حازم أبو إسماعيل قائمة أكثر الفيديوهات مشاهدة علي موقع «يوتيوب»، كما أن لقاءاته مع أنصاره محل اهتمام الشباب، وخاصة مع وجود ألغاز لم يستطع الشباب فك طلاسمها، أنصار الشيخ نصحوا الشباب بتعلم «أبو إسماعيل لانجوتش»، حتى يفهموا كلام الشيخ، فيما طالب آخرون أبو إسماعيل بالعودة للكرة الأرضية وألا يؤذي كوكبنا المسالم، فماذا كانت أبرز التعليقات؟.
بسمة محب: (من أقوال الزعيم الملهم سولاح بوسميعاين): وأنهم بيتجنبوا حاجات معينة وبيعملوا حاجات معينة.. طبعا إيه بقى الحاجات المعينة والحاجات اللي لما والحاجات اللي أحيانا.. ما .. ما.. مش هاينفع .. لكن إيوة لا.. يعني شغل كبير أوي .. وحتى الصعوبات اللي الحاجات اللي كانوا هيعملوها ومعملوهاش تدل على نوعية الصعوبات.. أنا أعتبر أن دي علامات شد عضلي..سيدي الزعيم.. إن الفجوة بينك وبين الكرة الأرضية تتسع .. عد إلى كوكبك سالما غانما.. أو انصرف ولا تؤذنا ولا نؤذيك.
منال علي: أنا عايزة جملة مفيدة.. بسم الله ما شاء الله هوا ومؤيدوه اتفقوا على عدم الفهم..
محمد غانم: إيه ده بيفكرنى بيونس شلبى فى العيال كبرت..
جلال النوساني: ما قولنا 100 مرة اتعلموا «حازمون لانجوتش» وبعدين تعالوا اتكلموا.. إحنا فهمنا..انتوا مش فاهمين دى مش مشكلته هو.. دى مشكلتكم أنتم..
علاء عبد الوهاب الشرباصي: مش عارف ليه بيفكرني بأحمد شفيق لما كان في الحملة الرئاسية.. وكل ما يتكلم الناس تحتار هو بيقول إيه ومحدش يفهم حاجة..
كارم منتصر: أنباء عن انضمام حازم أبو إسماعيل ل «جبهة الإنقاذ» بعد خبر تعيين بجاتو وزيرا..