شكوكيات

فيه ناس كتير عايشين في سكوت
ومشغولين في رغيف القوت
وأقول ياناس في الزحمة ح اموت
لأننى عايش مكبوت
ونفسى أعرف رايح فين
لكن الجميع بيقول ياعبيط
خليك في وسط الخلق حويط
افهم بقى وبلاش تنطيط
وكل حبة تقص شريط
وتقول أنا صاحب ملايين
الناس بعالم شكله مخيف
في حروب نزاع كلها تكاليف
وشعوب دول عايشين في نزيف
وكل يوم نازلين تأليف
بأننا في سلام عايشين
ولو تحاول تبقى صريح
وتقول لنا وبدون تلميح
إن الجميع في صراع وجريح
وما فيش نظام للحكم مريح
نقول صحيح كلنا عارفين
أنا نفسى واحد مرة يقول
ليه البشر عايشين في ذهول
وكل قاتل يوم مقتول
والمنضبط عايش معزول
لأننا ضد المسئول
عن النظام وعن القوانين
فإلى متى نفضل ساكتين؟!!!