هاشتاج البنزين يزلزل تويتر بعد رفع أسعار الوقود.. محمد: نركن العربيات أحسن.. مروة: المشي هو الحل.. هادي: كلها يومين ونتلهي في ماتش مصر وروسيا.. عامر: بنستقبل أي قرار بالضحك والهزار وبعد كده نعيط

هاشتاج «البنزين» يزلزل تويتر بعد ارتفاع أسعار الوقود
دشن نشطاء موقع التواصل الاجتماعي "تويتر" منذ قليل، هاشتاج "البنزين" وذلك بعد إعلان وزارة البترول زيادة أسعار المنتجات البترولية منذ الساعات الأولى من صباح اليوم.
وتصدر الهاشتاج قائمة الهاشتاجات الأكثر والأعلى قراءة على "تويتر" وعبر النشطاء عن غضبهم من زيادة أسعار المنتجات البترولية.
اركنوا عربياتكم
وغرد محمد سيد قائلًا: "اركنوا عربياتكم أحسن وخلوهم يشربوه ومتركبهاش إلا في الطوارئ، اركنوها يا جماعة إحنا مش وش عربيات أصلا".
المشي هو الحل
وقالت مروة محمد: "البنزين مش بالأهمية دي يعني إننا نزعل على غلائه اللي مشوار شغله قريب يمشي على رجليه ويوقف عربيته والله في ناس جايبة العربيات للمنظرة وفي ناس جايباها مشغلاها للمخصوص وبيتاجر بيها، وفيها إيه لما تجيب موتوسيكل أو عجلة تروح بيهم شغلك ومشاويرك، اركب أتوبيس وعيش عيشة باقي الناس".
بينما غرد محمد عامر: "كالعادة، المصريين بيستقبلوا أي قرار بضحك وهزار وكوميكس وسف، وبعدها بفترة يرجعوا يعيطوا من غلاء الأسعار، رغم إنك لو اتحركت في وقتها ممكن تغير وأقرب مثال دولة الأردن عطلت الطرقات لما المحروقات زاد سعرها".
كل حاجة بتتنسى
وقال هادي مدني: "يالا كلها يومين ونتلهي في تريند ماتش مصر وروسيا وننسى زي ما كل حاجه بتتنسى".
عدادات على الهوا
وغرد حلمي قائلًا: "إحنا قريب هانركب عدادات على الهوا في مصر أم الدنيا".
وكانت وزارة البترول أعلنت، منذ قليل، أن مجلس الوزراء أقر زيادة أسعار المنتجات البترولية اعتبارا من التاسعة صباح اليوم السبت.