نشطاء يطالبون بإقالة وزير الإعلام.. دشنوا «هاشتاج» على «تويتر» ردًا على إهانة الصحفية .. أبو على: إذا كان رئيس الدولة بالصوابع لاعبًا فشيمة وزرائه كلهم التحرش.. محمد: التحرش شعار الفترة

أثار الفيديو الذى تناقلته مواقع التواصل الاجتماعى، عن رد وزير الإعلام، صلاح عبد المقصود، على الصحفية، فى تساؤلها عن حرية الصحافة، قائلًا "تعالى وأنا أقولك فين"، سخط نشطاء موقع "تويتر"، فدشنوا حملة لإقالة الوزير، فأنشأوا هاشتاج يحمل اسم "حملة إقالة وزير الإعلام"، والذى لاقى استجابة كبيرة من النشطاء، معلنين استمرار حملتهم حتى إقالة الوزير.
فقال "أبو على": " إذا كان رئيس الدولة بالصوابع لاعبا فشيمة وزرائه كلهم التحرش"، وأضاف "إسلام": " يعنى هى جت عليه سيبوه قاعد".
وأوضح "جون غبريال": " ممكن نغير اسم الوزارة لوزارة التحرش عشان ما نجيبش حرج على الوزير"، بينما قال "مينا": " عيارهم فلت خلاص" .
وعلق "رامى حسن": " وبعدين دى مشكلتكم أنتم اللى بتخدوا كل حاجة على جوه !الراجل خير من يمثل الإعلام مثلما تكونوا يولى عليكم"، وأضاف "محمد عزو": " لما وزير الإعلام يصدر صورة زى دى ... يبقى اللى معينه أسوأ" .
بينما قال "محمد طارق": " المتحرشون بكرة يعملوا حملة "أنا مش إخوان بس باتحرش"، وأكد خالد": " ليس على الخروف حرجا" .
وأشار "إسلام" إلى أن: " شخصية إخوانية... أخلاق إخوان"، وعلق "أحمد عبد الله": "حملة إقالة وزير الإعلام.. عشان مش عايزين متحرشين فى الشوارع ولا فى مناصب قيادية ..عايزين مصر تنضف بقى" .
وتابع "عبد الرحمن": " وزير الإعلام كما رئيس الوزراء، لا أحد يحاسبهم على كلامهم الغبى وغير المسئول، من الحلمات وحتى تعالى وأنا أقولك"، ومن جهته قال "خالد": " الجاز........أو الإقالة"، وكتب "محمد": " التحرش شعار الفترة" .
وفى نفس الموضوع ؛ قال "عصام": " المفروض النقابهة يبقى ليها تصرف فى الموضوع دا ولا هو باسم يوسف بس اللى بيترفع عليه قضايا سخرية وخصوصا إن دى بنت"، وأضافت "منال": " إقالة ليه ؟ هو قصر ف شغله؟ده واحد سافل تحرش لفظيا بأنثى فى مكان عملها !فين القانون ؟" .
واستطرد"رامى حسن": " عشان الراجل اتفك بكلمة عايزين تشيلوه وسايبين اللى بيقتل ويسحل ويعتقل الناس وزير البلطجية الشعب يريد إسقاط النظام"، وقال "محمد طارق": "حملة إقالة وزير الإعلام .. عشان مينفعش يشغل منصب رفيع إنسان وضيع" .
ويضيف "كريم علاء": " أداؤك لايؤهلك لتكون وزيرا بالكتير غفير"، وكتب "سليمان": " مطلوب احتجاج ووقفة من الإعلاميين لتدنى مستوى الحوار لوزيرهم ومن يمثلهم لثانى مرة، المطالبة بإقالتة مش مجرد هاشتاج" .
فى حين قال "محمد مجدى": "حد قالك قبل كدة إن أنت قليل الأدب .. لو ماسمعتهاش قبل كدة تعالى انت بقى وأنا اقولك"، وتابعت"روان": " والله لو عملتوا 100 مليون حملة ما هو لازق على الكرسى زى اللى عينه بالظبط .. ربنا ينجينا" .
"وفاء سالم" قائلة : " أنا مش مع الحملة دى .. هو شبه حكومته وشبه رئيسه .. عاوزين واحد محترم يلمع وجوههم ليه؟ خليه يعك ويعجل بنهايتهم أكتر" .
وأوضحت "سارة": " بس متقولوش وزير. وماتنسوش برضه إن الراجل شغال فى بلد رئيسها مرسى ورئيس وزرائها" .
أما "دودى الشربينى": " والأغنية دى بنقدمها للسيد الوزير أغنية تعالى أقولك هتقول ايه لازم أقولك"، وأضاف "أحمد سمير": " الصحفية اللى سألته السؤال الصراحة مستفزة هو حرية صحافة أكتر من اللى إحنا فيها ؟"
و قال "عمر وديع": " والله ما كان يجرؤ صفوت الشريف أو أنس الفقى بكل ما بهما من فساد أن يقولوا كلاما بحقارة كلام وزيرالإخوان عديم التربية!"، وأضافت : "ريماس فارس": " النهضة بتناديلك روح ابقااااااا وزير نهضاوى".