بالصور.. ذكريات المصريين مع الرنجة والفسيخ في شم النسيم.. هالة: بابا كان بياخدنا كل مرة في حته.. عمرو: الميرلاند أحلي حاجة.. محمد: كلورتس الراعي الرسمي لليوم.. وباربى: ملناش في الفسيخ

يُعد عيد شم النسيم من الأعياد المصرية الخالصة، التي لا يعرفها إلا المصريون ويحتفلون به من خلال أكلات وطقوس خاصة جدًا، فالرنجة والفسيخ والبيض والبصل من أهم آكلات اليوم، ولهذا اليوم طقوسه الخاصة التي يتذكرها المصريون من خلال هاشتاج "شم النسيم"، الذي دشنه نشطاء مواقع التواصل الاجتماعي "فيس بوك وتويتر"، واحتل مركزًا متقدمًا على تراند مصر بتويتر، حيث قاموا بنشر صورهم وذكرياتهم الخاصة في هذا اليوم.
زمان
قالت هالة أينف "شم النسيم.. كان أيام بابا الله يرحمه مرة جنينة الحيوانات. مره الهرم ومرة روحنا القناطر الله يرحمه بعده بقيت اقعد في البيت بس ده من زمان بأه".
وأضاف عمرو عبد الحكيم الزهيري: "أحلي حاجه في عيد شم النسيم في حديقة الميريلاند أو معظم حدائق مصر تلاقي ناس خارجه ما تعرفش تفرق بين مسلم أو مسيحي... بس تقول الله على المصريين... ربنا يدومها فرحة".
وعلقت نور سجربي: "عاملين في الكمبوند حفله للأطفال بمناسبة شم النسيم وجايبنلهم نطاطات وألعاب، بس الفكرة إنهم مشغلنلهم "ونبي ياما ياما هموت عليها ياما".
ورد على على "بمناسبة شم النسيم.. أنا عمري ما كلت فسيخ أو رنجة وماعنديش أي فضول أجرب الصراحة"، وتابع محمد رضوان "لبان النعناع كلورتس الراعي الرسمي للمصريين يوم شم النسيم".
التجمع
وقال مجدي: "أجمل حاجه في حوار شم النسيم دا أن البيت كله كنا بناكل سوا ودي محصلتش من سنتين مثلا عشان طبيعة شغل وسفر كل واحد فصعب نتجمع على الأكل سوا".
وأضافت آلاء نبيل: "شم النسيم اللي فات كنت في الأرض مع بنت عمي ومحمد ابن بنت عمي التانية فشفنا كلاب بتجري قام مسك في إيدي قلتله إنت خايف قالي أه قلتله وأنا كمان...".
وعلق أبانوب مجدي "هو مُمكِن نعيّد من غير ما اللي بيحِب الفسيخ يتّريق على اللي مابيحِبّوش، واللي مابيحِبّوش يبطّل يشوف اللي بيحِبه كائِن ريحته وحشة! شم النسيم".
ورد باسم شمس الدين: "بيض ملون وبصل أخضر وفول وفلافل وبتنجان مقلي ومخلل وحلاوة طحينية وعصير فطار شم النسيم ولعب كورة وجوايز وحاجة ساقعة وبسكوت والدنيا ربيع والجو بديع والكلام ده كان ناقص يجبولنا المرحومة سعاد حسني كمان.. شم النسيم".
وتابع باربي نودي "وإن ذكرنا شم النسيم نذكر دكتور إبراهيم لما أدانا محاضره ال botulism قبلها.. عمل اللى عليه وبردو مافيش فايدة على رأى سعد زغلول الحمد لله ملناش فى الفسيخ.. ذكريات" .
رنجة وفسيخ
وقالت سالي مصطفى: "البيض الملون والبريوش والارانب هم ابطال اليوم شم النسيم سعيد على كل الحلوين"، وأضاف أحمد خالد ياسين: "شم النسيم في سنة تانية صحيت من النوم المغرب أساسا فكان اليوم خلص وصاحوني من النوم الصبح علشان اسافر معاهم بس زعقتلهم ساعتها تقريبا".
وعلق محمود التونسي: "شم النسيم.. القناطر الخيرية أوعة الرنجة والفسيخ.. والله الشعب محتاج فرحة وفسح وخروج كفايا هم"، ورد مخيمريشن مخ:"ماما ملتزمة دينيًا إلى حد ما، بالتالي اتعودنا في بيتنا إن يوم شم النسيم دا يوم إجازة نريح فيه،والفسيخ والرنجة موجودين دايمًا يعني".
وتابع بلانك: "كانت الربابة بتبقى مغرية أوي وأنا طالع من حديقة الحيوان يوم شم النسيم دا وأنا صغير. وأجيبها كل مرة وتبوظ كل مرة والدنيا تستمر".