أبين زين

يا مجلس الشعب يا حكومة صلاة الزين.. مافيش لكم عندنا غير كلمتين اتنين.. التصريحات كلها حلوة تسر العين.. لكن بقى الناس بتصرخ إحنا رايحين فين.. السوق بقت نار ومش عارف حنشكي لمين.. وحأقول كلام كل حبة والجميع سامعين.. إن البلد من زمان عايشة تسد الدين.. وكل واحد يقول لك عجز بالملايين.. وأنا نفسي أعرف في يوم خطة لها مضامين.. وتاريخ محدد لبرنامج وناس عارفين.. إيه المشكلات وإيه الحل في سطرين.. والمعترض ينطرد لو كان يريد تخوين.. أو ماشي خلف الجماعة ينصبوا لنا كمين.. ياحكومة فيه ناس كتير بتقول لكم آسفين.. الالتزام بالقانون واجب بكل يقين.. لكن يكون فيه مرونة بكل الميادين.. علشان شباب البلد يعرف طريقه لفين.. مش بالخطب والكلام فيه مؤتمر واتنين.. وبعدها كل شيء كما كان سنة واتنين.. وأنا قلت كل اللي عندي وكلكم شاهدين.. ونفسي أسكت لأني تعبت يا قارئين.