شلاليت

الكيلو سكر بعشرة جنيه في كل مكان
وسعره كان بالجنيه والنص.. بس زمان
ولسه حيزيد في أسعاره كمان وكمان
لأن فيه ناس بتكسب والجشع سرطان
00000000
فيه عندنا مفتشين.. لكن حيعملوا إيه !!
والسوق في إيد محتكر فرحان بما يجنيه
وكل واحد تقول له.. الكيلو عشرة جنيه
يقول ياريت سعره يثبت عندنا وألاقيه
000000000
وكمان بقى سعر كيلو اللحمة بالجنيهات
مائة وعشرين جنيه وياريت يكون في ثبات
والسوق بقى كله نار والعة وفيه حكايات
مالهاش بداية ولا نهاية مع الأشتات
0000000000
وإن قلت إيه الحكاية يقولوا فيه تبذير
من المواطن لأنه شريك بدون تفكير
ياكل ويشرب ويصرف مال بدون تبرير
وإن قلت له مش كدا يضحك بدون تفسير
000000000
مع إن فيه ناس غلابة تاكل العيش حاف
ولأنهم مخلصين وعندهم إنصاف
يقولوا طول عمرنا من ربنا بنخاف
ونفسنا السوق يكون عادل بدون إجحاف
00000000000
ياحكومه سوق السلع محتاج لجهد كبير
لأن فيه ناس بتنهب من جيوبنا كتير
وكلهم في البلد نازلين كما المناشير
والناس عشان لقمة لعيالهم تقف طوابير