بهلول المشغول: الحاكم بيقولي اصبر

أنا المواطن مصري
عايش هنا مغمور
سابق أواني وعصري
بس اللي جاي بيغور
عندي وظيفة ميري
ودخل شهري تمام
بس بستلف من غيري
علشان أرضي المدام
ما هو كل شيء ف زيادة
إلا المرتب يا سادة
بخاف لو ابني يمرض
ملقاش أدوية وعيادة
أجرالوظيفة ألفين
ودا شيء بقاله سنين
والسلعة هي هي
سعرها زاد مرتين
دا غير متطلبات العصر
إني أصبّح على مصر
وكمان لازم أتبرع
لصندوق تحيا مصر
طب قولوا أجيب منين
وهي هي الألفين
واللي كنت أجيبه بقرش
دلوقتي بقى بقرشين
مش عارف هعمل إيه
وسني بقى ستين
طالع معاش يا بيه
ومعاشي ألف ومتين
أشكى لمين مش عارف
والحاكم بيقولي أُصبُر
أشرب أنا م المصارف
وهو ياكل ويُهبُر!!