نشطاء يسخرون من الطلبة في «أول يوم جامعة».. حامد: «الجامعة كافيتريا للي عاوز يروق».. إبراهيم: «كنت تايه ولا فاهم حاجة وبدور على فصلي».. نجم: « إيه الحكمة في إنك تلبس جديد».. ومي: «مش عايزة أروح تاني»

دشن نشطاء مواقع التواصل الاجتماعي "فيس بوك وتويتر" هاشتاجا بعنوان "أول يوم جامعي"، الذي حقق مركزًا متقدمًا على تراند مصر بتويتر، وسخر النشطاء من طلبة أول عام جامعي لهم، وخاصة الملابس والماكياج، مؤكدين أن طلبة الدفعات المتقدمة في الجامعة يعرفون أول دفعة جامعية من خلال تلك الملابس، مقدمين نصائح خاصة لطلبة الجامعة في أول يوم دراسي لهم.
الحضور
قالت شيرين العجرمي: "توثيقا لأول يوم ليا في الكلية يارب أحبها ومكرههاش زي المدرسة وميكنش آخر يوم"، وأضاف حامد حسن الفرجاني: "الجامعة مدرسة للي عاوز يتعلم.. كافيتريا للي عاوز يروق.. كازينو للي عاوز يسهر".
وعلق عبد الرحمن حسن قائلًا: "أول مرة أشوف حد دخل الجامعة يلتزم الحضور من أول يوم.. أيامنا كنا بنروح بعد شهر تقريبا وده كان أكثرنا التزاما".
وتابع محمد مجدي: "أول يوم في الجامعة لازم تقابل واحد تحكي معاه.. وبعد كدا متشفهوش تاني خالص لحد التخرج".
البدلة
وقال إبراهيم أحمد: "افتكر أول يوم في الجامعة كنت تايه ولا فاهم أي حاجة وكنت بحسب الجامعة زى المدرسة وادور على الفصل بتاعى والشغل الضيق دا.. أول يوم جامعي"، وأضافت ميادة محمد: "تقريبا أنا الوحيدة في مصر اللي منزلتش الجامعة النهاردة ومتصورتش وكتبت أول يوم جامعة".
وعلق محمد جمعة "أول يوم جامعي ابن مين في مصر انت عشان تروح الجامعة بالبدلة"، وردت مي على:"ملخص أول يوم جامعة.. مش عايزة أروح الجامعة تاني"، ورد أدهم عبده: "لا انتى فاهمة غلط دا أول يوم جامعة مش حنة بنت خالتك".
يوم مالوش لازمة
وقال محمد إبراهيم: "عن الصدمة اللي بياخدها طالب أولى جامعة لما يكتشف أن أول يوم ده يوم مالوش لازمة أصلًا مكنش يستاهل كل الحماسة دي ولا كان يستاهل إنه ينزل أصلًا".
وكتبت أسماء: "أحلي حاجة إنك بتقابلي أصحابك وتاخدي لفة في المبني الكلية ولازم تتوهي.. أنا لحد ما اتخرجت كنت بتوه ساعات ف مبني مدني".
وتذكر محمد عيسى: "الطلاب اللي شايفهم داخلين الجامعة ولابسين جديد.. هو إيه الحكمة في إنك تلبس جديد أول يوم جامعة؟!".
إيه السر
وكتب نجم: "فكرت كتير جدًا عشان ألاقي سبب مقنع يخلي واحد يروح الجامعة أول يوم في الدراسة لابس بدلة كاملة وملقتش!!".
وقالت هاجر حاتم: "هي الناس اللى داخلة الجامعة بشنط ع الضهر دول مالهم في إيه ها!.. احنا أول يوم لسه مفيش دفاتر مفيش حاجة لسه"، وأضافت سندس سامح: "إيه الروشنة في إنك تروح أول يوم عشان تروش على الدفعة الجديدة؟ دخلت الجامعة على سنة 4 على طول انت ولا إيه؟".
وتابع محمد الوكيل "الفرقة الأولى هي من تمثل دور هنيدي في صعيدي في الجامعة الأمريكية.. أول يوم جامعي".