الحزن يسيطر على نشطاء التواصل الاجتماعي لانقلاب قطار العياط.. خالد: كل سنة لينا كارثة في السكة الحديد.. أحمد: القطار ده بيعيد علينا كل سنة.. عمرو: اتكتب على الشعب المصري النكد والهم في العيد

حالة من الغضب الممزوج بالحزن انتابت نشطاء مواقع التواصل الاجتماعي "فيس بوك وتويتر" بسبب حادث انقلاب 3 عربات من قطار "القاهرة- أسوان" في محطة العياط، ودشن النشطاء هاشتاج "العياط"، الذي تصدر تراند مصر على تويتر.
النشطاء أكدوا أن حادث قطار العياط يتكرر كل عام، ويسفر عن مقتل عدد من المصريين المسافرين لقضاء العيد في محافظاتهم بالصعيد، واصفين ما حدث بالمهزلة التي تحدث نتيجة إهمال المسئولين.
ربنا يرحم
قال عبد الله إبراهيم: "ناس بترقص وناس بتموت ربنا يرحم الجميع وحسبنا الله ونعم الوكيل في كل ظالم فاسد... العياط".
وأضاف خالد كابو: "العياط.. هو لازم كل سنة لينا كارثة خاصة لسكة حديد مصر.. بقى واقع مجبر وبدون أي تصحيح مسار".
وعلق أحمد سلجش ستار: "العياط.. هو القطار ده لسه موجود.. ده بيعيد علينا كل سنة، عدية نكد.. الغوا القطار ده شؤم. عامل زي رقم 13 في الفنادق".
ورد أيمن حنين: "قطار العياط وقبل عيد الأضحى وكأنها مناسبة سنوية! ربنا يرحم اللي مات".
وتابع أحمد عبدو: "العياط مناسبة كل سنة وتحس كأنها بقت من الإجازات الرسمية".
قطار العيد
وقالت منة ميما: "وطبعا مينفعش العيد يعدي من غير حادثة قطار.. ولا حد بيتحاسب على الإهمال والكوارث اللي بتحصل دي.. العياط".
وأضاف حسام الدين قاسم: "نفسي أفهم إيه حكاية العياط وحوادث القطارات!".
وعلق محمود عمران: "وكالعادة في صباح يوم جديد حادث جديد.. خروج قطار الصعيد عن القضبان في.. العياط".
ورد برسونا نن جراتا: " الواد بتاع العياط اللي ماسك السكينة (المزلقان) بياخد عشرين جنيه عشان يقلب القطورات".
وتابع منعم: "قطار العياط وهو ينقل فقراء المصريين قبل أيام قليلة من العيد.. وجع مصر".
نكد وهم
وقالت إيمان محمد: "وفاة 2 وإصابة 14 حتى الآن في حادث انقلاب 3 عربات قطار في العياط وتوقف حركة القطارات في وجه قبلى.. حسبنا الله ونعم الوكيل".
وأضاف طه طه: "10 مصابين في حادث خروج قطار عن القضبان في العياط بالجيزة قطار العيد بتاع كل سنة!".
وعلق عمرو شحاتة: "العياط.. اتكتب على الشعب المصري النكد والهم دايما حتى في دخلة الأعياد".
ورد الماجيكو: "مش باقى منى غير شوية لحم في كتافى.. بلاش يتحرقوا في قطر الصعيد في العيد.. العياط.. حسبى الله ونعم الوكيل".
وتابع محمود عمران: "حوادث العياط.. قطار الصعيد 20 فبراير 2002 وفاة 361 شخصا.. 24 أكتوبر 2009 مقتل 30 شخصا.. 31 يناير 2016 مقتل 6.. 7 سبتمبر مقتل3 حتى الآن.. ويستمر الإهمال".
وكتب شادي شاهين: "يا وابور الساعة 12 يا مقبل على العياط.. عمال تقتل وتواصل وتزود في الأموات...".
وقال أحمد سيد: "احنا مايهدلناش بال ونرتاح غير لما نسمع ونشوف مصيبتين تلاتة كده أتأكد إني في مصر الحمد لله.. العياط".
وأضاف زيزو: "بيحققوا مع سواق القطر يا جدعان دا المميز يعني لو واحد جري جنبه هيسبقه.. دا بيقف اكتر ما بيمشي.. العياط".