أول ما دخلت البيت لقيت أم العيال مقطعة هدومها وناكشة شعرها ورافعة ايديها للسماء وبتدعى والعيال التلاتة بيقولوا أمين! كان دعاؤها: اللهم أرسل عليهم طيراً أبابيل ترميهم بحجارة من سجيل، أو ارميهم فى قاع سقر التى لا تبقى ولا تذر، أو اجلسهم على الخازوق لتخليص جميع الحقوق، ودار هذا الحوار بينى وبين أم العيال. إيه يا ولية.. أنتى بتدعى على حماتك ولا عليا؟ لا .. يا خويا.. ربنا يخليك ليا أنت وأمك.. أنا بادعى على كفار قريش.. هاااار أسود.. بعد 0041 سنة جاية تدعى عليهم دلوقتي؟ أنا بادعى على المدرسين.. المزغودة بنتك اللى فى تانية اعدادى جات م المدرسة وبتقول كل مدرس عايز 001 جنيه للدرس الخصوصى القصد.. رحت المدرسة اتفاهم مع المدرسين.. لقيت أبو لهب وأمية ابن خلف والعاص ابن العاص.. شرحت لهم ظروفنا الطين.. عملوا ودن من طين وودن من عجين.. تلاتة من كفار قريش.. كانت مدرسة الدين واقفة واسمها أم جميل.. حمالة الحطب.. صعبت عليها.. أم جميل: احل لك المشكلة.. تيجى لى أنا ومدرسة الألعاب كل جمعة وسبت تمسحى لنا الشقة وسلم العمارة وتغسلى هدومنا.. بدل ما تدفعى فلوس الدروس الخصوصية.. أم العيال: يعنى تاخذوا مرتب جوزى وتشغلونى خدامة عشان بقية الدروس؟ أم جميل: إن كان عاجبك يا ست.. أم العيال بتكلمني: الحكاية ما خلصتش على كده.. المزغود الصغير اللى فى تانية ابتدائى بيقول عايز فلوس لدرس الإنجليزى .. أنا: هوه فيه إنجليزى فى تانية ابتدائي.. على أيامنا كان فى الاعدادي.. يا بنى هاجيب منين.. اختك اللى فى اعدادى أخذت مرتبى وعليهم أمكم هتشتغل خدامة.. هاجيب منين؟ المزغود الصغير: مش أحنا يا بابا كنا راكبين المترو معاك.. فاكر لما شوفنا شحاتين كتير فى المترو.. أعمل زيهم يا بابا.. ده الشحات من دول على قلبه قد كده.. وادينى الفلوس علشان الدرس. أنا: نهاركم أسود.. دفعت مرتبى وامكم تشتغل خدامة وعايزينى اشتغل شحات فى المترو عشان دروسكم.. منكم لله يا كفار قريش. المزغودة الوسطانية: بابا .. بابا.. أنت معاك كنز بس ناسيه! أنا: كنز إيه يا بنتي؟ الوسطانية: أنت يا بابا تروح تبيع كليتك زى الناس ما بتعمل ..ما أنت عندك اتنين .. بيع واحدة تسدد بيها ديونك وتدينا فلوس للدروس وتحط الباقى فى البنك باسمى عشان لما أكبر واتخرج ادفعهم رشوة عشان اتعين فى وظيفة كويسة.. وبالمرة أرباحهم السنوية تأكلنا بيها لحمة.. ولما ربنا يفرجها عليك ابقى اشترى لك كلية جديدة.. مبسوط كده يا بابا من الحل ده؟ أنا: قومى يا ولية ولمى كل عيال الجيران وجيران الجيران عشان ندعى على كفار قريش فى نفس واحد «رب لا تذر على الأرض من الكافرين دياراً إنك أن تذرهم يضلوا عبادك ولا يلدوا إلا فاجراً كفاراً».. قولوا آمين!
