النواب بقوا إعلاميين على حساب أصوات المساكين

أنا بقى جمعتكم النهارده يا أهل دايرتى علشان أقولكم كلمتين واقفين في زورى بقالهم زمن.. خاصة أن الموضوع اللى أنا عايز أتكلم فيه انتشر بين النواب وزاد عن الحد.
فنوابكم الذين اخترتموهم وفضلتموهم على العبدلله ماهماش فاضيين لحضراتكم.. وأنا بصراحة شمتان فيكم.. بعد أن أصبحوا يمتهنون مهنا أخرى جديدة لم يكونوا ليصلوا لها لولا أصواتكم التي بخلتم بها عليا أنا ابن دائرتكم البار.
فمثلا.. نائبكم اللى بقى إعلامي ومقدم برامج وصاحب قناة فضائية، وبيتكلم في الكورة وفى الفن وفى الباليه وحضراتكم مش في دماغه أصلا.
وطبعا مش هو لوحده اللى عامل مشروع إعلامي بالشكل ده.. لكن هناك نوابًا كثيرين منهم الذي أصبح إعلاميا ومنهم الذي أصبح محققا ومنهم الذي أصبح نائب ضبطيات.. أما أنتم فلكم منهم حضور واجبات العزاء والأفراح والليالى الملاح.
نوابكم يا حضرات لم يعودوا متفرغين لحل مشكلاتكم كما وعدوكم أثناء حملاتهم الانتخابية.. وطبعا حد منكم هيطلع يقولى إن القناة التي أنشأها سيادة النائب تناقش مشكلات الغلابة.
وأنا بقى هرد عليه بقولى: ماهى كل القنوات بتناقش مشكلات الغلابة ياروحى.. لكن فين الحلول بقى؟!
وكيف يتحول نائب مثلا من معالج بالأعشاب إلى إعلامي.. من السبب؟!.. أصواتكم هي السبب.. وأنا هنا أصرخ وأقول "النواب بقوا إعلاميين على حساب أصوات المساكين".
مع تحياتى: أخوكم "نزيه صندوق عبد المتعال الناخب" الشهير بالبااارلمنجى..
نائب ساقط في برلمان 2016