شباب يروون معاناتهم مع أسمائهم الغريبة.. صافيناز: «بحس اسمى استغفر الله العظيم جربة».. أحمد: «بقيت أبو السلاطين».. ثمار: «دخلت زراعة والناس بتألش عليا».. ومحمد: «بعاني عشان أبويا حسن البنا»

نشرت صفحة "الكومنت الفصيل" عبر موقع التواصل الاجتماعى "فيس بوك" بعض مواقف متابعيها مع أسمائهم الغريبة وشكوتهم مما يعانونه بسبب تلك الأسماء.
- معاناة صافيناز
قالت صافيناز: "همك يا آنسة مش هيكون هم أكبر من واحدة مثلى اسمها صافيناز، والله اسمى في أي مكان في أي زمان بقيت بحسه استغفر الله جربة".
- "أحمد" بقى "أبو السلاطين"
وأضاف أحمد: "تخيلو أنا اسمى أحمد وبقالى قد إيه مسمعتوش كل واحد بينده عليك بطريقته إلا أنه يقول اسمك، أمي تقولى يا ابني قوم اعمل كذا.. أبويا يقولي ياحيلة أمك اعمل كذا.. صحابي يقولولي يا سلطااااه اللى هو اسم جدي أو يا أبوالسلاطين.. طب أنا مش مهم أبويا ملوش اعتبار يندهولي باسمه يعني".
- ثمار
وروت ثمار: "طب ما أنا اسمي ثمار، بينطقوه صمار وسمار وواحدة صحبتي بتقول زمار.. لا ودخلت كلية زراعة والناس بتألش تقولى أنهى ثمرة بقى؟ واللي يقولى واقعة من شجرة.. واللي يقولى أبوكي كان جعان عادي".
- أنا مش إخوان
وقال محمد: "أنا بقى والدى اسمه حسن البنا وأنا شغال في سيناء، وكل يوم بعدي على النفق وربنا كرمنى باللحية.. تخيلوا بقى مش ناقص أعلق ورقة على صدري واكتب "والله ما إخوان".
- نصيرى مسلم ولا مسيحي
وأضاف نصيري: "أمال أنا أعمل إيه اسمي نصيري محمد، وأول سؤال بتسأله انت مسلم ولا مسيحي.. دا غير اللي بيفكره دلع نسرين وكمية الناس اللى مفكريني بنت، أنا بعانى يا جماعة وربنا دا غير أن مفيش حد بينطقه صح من أول مرة".
- محرم بتاع المخطوبين
وروى أحمد محرم: "طب أنا اسمي أحمد عادي وأبويا اسمه علي عادى المشكلة في اسم جدي الكبير "محرم" وكل الحروف تحتيها كسرة.. بيجيلي بقى اللي بيستظرف ويقولى انت بيقعدوك مع اتنين مخطوبين ولا بيسفروك سفريات الحج.. اتعقدت من الاسم ده".
- عفراء
وقالت عفراء: "طب وربنا اسمك جميل للأسف، أنا اسمي عفراء وحاسة بمعاناتك جدًا والله بس بصراحة أنا حبيت اسمي أوي لما كبرت، وعرفت معناه يعني مثلا بتنادي بعفاف وعفرة والرخمين بقى يقولوا انتي اسمك عفار، يعني تراب، وفي اللى بيقول عذراء وشوية أسماء ليس لها صلة بقاموس الاسم بس عايشة عادي خالص".
- دينا ولا دنيا
وأضافت دنيا: "طيب أنا دنيا.. وفي شهادة ميلادي دينا وبطاقتي دينا وشهادة التخرج دينا، والأكتر من كده قسيمة جوازي دينا وشهادة ميلاد ابني دينا المشكلة مش دي خالص المشكلة أن أختى اسمها دينا".