بالفيديو.. باسم يوسف يسخر من الدكتوراه الفخرية ل "مرسى".. مرسى وباكستان "فيرى جود ميكس" فى "الليلة مع مرسى".. وأهالى بورسعيد بخروا البلد عشان حسد الرئيس.. ويبدأ السخرية من "مرتضى"

سخر الإعلامى باسم يوسف من زى الدكتوراه الفخرية الذى ظهر به الرئيس محمد مرسى فى باكستان، عن طريق ارتدائه معطفًا مشابها له وقبعة ضخمة.
وقال "يوسف" خلال برنامجه الذى يقدمه على قناة "سى بى سى": إن هذه القبعة قام بصناعتها منجد فى العتبة ب35 جنيها، مضيفا: "هى كل حاجة واسعة عليك كدة يا ريس، عيب يلبسوك كدة يا ريس".
فى الإطار ذاته سخر باسم يوسف من كلمة "دونت ميكس" التى قالها الرئيس محمد مرسى أثناء زيارته فى باكستان، قائلًا: إنت مفيش حاجة بتمكس معاك خالص؟"، معلقا على شهادة الدكتوراه الفخرية فى الفلسفة قائلًا: "فلسفة.. دكتوراه.. مرسى.. باكستان"، هو دا الدونت ميكس، ومحدش كان بيفهم حاجة من خطابات الرئيس؛ لأنه كان بيتفلسف والباكستانيون هما اللى فهموا، ومحمد مرسى وباكستان فيرى جود ميكس".
وقال للرئيس محمد مرسى: "إن شاء الله يا ريس هاتكمل معانا للآخر، بس إحنا اللى مش مكملين معاك، الشعب هايخلص"، وشبه إشارات مرسى بيده أثناء الخطابات ب"تمرينات النهضة"، وفى تعليق على كثرة خطابات الرئيس قال: هايعمل برنامج "الليلة مع مرسى".
وسخر باسم يوسف من كلام الرئيس مرسى فى خطابه لأهالى بورسعيد قائلا: "مرسى كان مع الناس وروحه فى حتة تانية وكان عاوز يكلمهم من حتة ثالثة، والفلاسفة مبيبقوش فاهمين عاوزين يقولوا إيه، واحنا بنشتغل عليهم"، وأضاف: "أهالى بورسعيد بخروا البلد علشان حسد الرئيس بعد تعليقه: "أهالى بورسعيد كسيبة".
وفى تعليق آخر على الخطاب قال: "الكلمة بتخاطب وجدان أهالى بورسعيد، ومدام وجدان فهمت حاجة؟"، وللمرة الأولى سخر باسم يوسف من المستشار مرتضى منصور قائلًا: "يا مرتضى يا مرتضى، أنا جيبت سيرتك يا مرتضى"، وتابع: "خالد عبدالله، وتوفيق عكاشة، ومرتضى منصور لايقين على بعض"، كما علق على صورة للإعلامى "عادل حمودة" قائلًا: "حمودة مش بتاع ساندوتشات، دة بتاع مؤامرات".
وفى الفقرة الأخيرة من البرنامج استضاف يوسف، ممثلة كليب "ضحكة عيون حبيبى" لعمرو دياب، وهى من القلائل التى تجيد اللعب على الطبول.