أطرف كوارث الفتيات في «أول يوم بالمطبخ».. ملك: غسلت الرز ببريل.. آلاء: عملت كيكة بالنشا.. ضحى: قليت السمك من غير دقيق.. آية: عملت طعمية بالفانيليا.. «جيجى» تحرق البيت.. و«ملوخية زهرة» لا تنسى

نمتلك جميعا ذكريات ومواقف مضحكة لأول يوم لنا في المطبخ، حيث ظهرت ال‘بداعات خلال ‘عداد الطعام، ولأنها مواقف تعلمنا بعد ذلك كيفية التصرف بشكل صحيح، تظل عزيزة على قلوبنا وتضحكنا كل ما نتذكرها، وهذا ما جعل نشطاء موقع التواصل الاجتماعى "فيس بوك" بتدشين "إيفينت" جديد بعنوان «مواقف المطبخ»، لتذكر مواقف المطبخ المضحكة، والمشاركة مع الأصدقاء، وحازت الفكرة على إعجاب العديد من رواد الموقع خلال أيام قليلة من إنشائها.
غسلت الأرز ببريل
حرصت ملك أحمد، على تدوين ذكرياتها لأول مرة لها في المطبخ، قائلة: «المرة الوحيدة اللي حاولت أدخل مطبخ وكنت صغيرة وساعتها غسلت الرز ببريل ونقعته فيه، ومن ساعتها علاقتي بالمطبخ انتهت من قبل ما تبدأ أصلا».
كيكة بالنشا
وقالت آلاء جمال: «عملت الكيكة بالنشا بدل الدقيق، عشان مكنتش بعرف أفرق ما بينهم طلعت زي الجبس».
ولعت في المطبخ
وأضافت جيجى مليجى: «مرو ماما كانت بتسيح سمنة ع النار، وأنا دخلت المطبخ لقيت حاجة سودة بتتحرق روحت مليت ميه وكبيت عليها وعينكم ما تشوف إلا النور، الحمد لله المطبخ اتحرق بس أنا طلعت سليمة».
أما ضحى محمد، فذكرت ساخرة: «قليت السمك من غير دقيق».
موقف المحشى
وكتبت مى جمعة: «أول مرة أعمل محشى كرنب،، غطا الحلة كان أوسع من الحلة، كسلت بصراحة أدور ع الغطا، أهو غطا يقضى الغرض والسلام، بعد ما استوى، بوارب الغطا عشان أصفى الميه بتاعت المحشى، أجى افتح الغطا، الغطا مش راضى، يمين شمال أحرك مفيش، متقولش ترباس واتقفل، لميت اللى في البيت، وقولتلهم المحشى جوه الحلة والغطا زانق مش بيفتح اتصرفوا مجهودى هيروح بعد محاولات، وخبط ورزع في الحله استمريت 10 دقايق كدهون، تم بحمد لله فتح الغطا والمحشى تمام بصحة جيدة».
طعمية بالفانيليا
وذكرت آية عبد السلام: «مرة دخلت أعمل طعمية وبعدين بدور على الكربوناتة، وبعدين لاقيت كيس في حاجة بيضه شكلها كده وحطتها ع الطعمية، وانا بعملها طالع ريحة جميله أول مره اشمها طلعت أول واحدة لاقيت طعمها مسكر، وطلعت ف البيت كله ريحة حلوة وطلعت ف الآخر فانيليا».
لحمة فحمة
وكتبت سلوى محمد: «كانت أول مرة أعمل لحمة، وكان عندنا عزومة تاني يوم، وماما قالتلي خاليها تغلي شوية واطفي عليها وداخلوا كلهم يناموا، وأنا قاعدة جنب اللحمة مش راضية تستوي ولا حتى نص سوي، فدخلت أوضتي وقولت شوية وهبص عليها راحت عليا نومة بعدها بساعة صحيت من كتر الدخان اتخنقت بفتح عنيا مبقتش شايفة حاجة من كتر الدخان، قولت أنا بحلم ولا إيه افتكرت اللحمة ببص عليها لقيتها فحمه، والحلة بتتحرق واحط عليها ميه بتولع أكتر وكل البيت صحى وكان يوم عالمي».
غسيل الفراخ
وكان لمى أحمد، موقف أكثر طرافة، حيث قالت: «كانت أول مرة أدخل المطبخ، وماما طلبت مني أغسل الفراخ، وأنا ما بحبش الجلد، شيلته كله من عليها، تقريبا سلختها، وحطيتها في المية، وحطيت معاها كمون وشطة وورق عنب مجفف ع أساس أنه ورق لورا، وبعد ما استوت حطيتها في الفرن وحطيت في الصلصة سكر بدل الملح، وتقريبا مكنش مطبخ كان قرافة بعد كتير من الخساير والإصابات، وزرنا المستشفي بعد الأكل».
الوصفة فن
وسردت سارة علاء، موقفها قائلة: «مرة كنت بشوف فيلم أجنبى المهم كان في مشهد لولد بيطبخ والبنت بتسأله إيه الوصفة، قالها مفيش وصفة الأكل دا فن! ومن يومها وأنا بطبق مقولة إن الطبخ فن هو آه، فعلا عمرى ما نجحت بس عندى أمل لسا grin emoticon، المهم أنا عندى قناعة إن الشاطرة هي اللى ما تكونش مضطرة تغسل أطباق كتير، فجيبت مكونات الكيكة كلها وحطتها ع بعض في طبق واحد في مرة واحدة، وضربتها بالمضرب بردو في مرة واحدة، وحطيتها في الفرن وأنا براقبها وهى في الفرن زى الأب اللى بيستنى مراته تولد في أوضته العمليات، وجت المفاجأة طلعت كيكة حامل، وف اللحظة دى بابا دخل وفصل ضحك وفضحنى، فغزتها بالشوكة فاتحولت من كيكة حامل لكيكة مكرمشة زى ما تكون راجل عجوز بس طعمها كان حلو أوى الطعم أهم حاجة».
ملوخية ساقطة لفوق
وتابعت زهرة الوادى: «كل الناس بتعمل الملوخية ساقطة لتحت، أنا عملتها ساقطة لفوق الملوخية على الوش والشوربة تحت وده قمة الإعجاز العلمي».