«ازنق نفسك ساعتين» لحماية شبكات الصرف

فى عهد مبارك كنا «بنحشش» وفى عهد مرسى «بنحسس»
« طب اقطعوا النور وسيبولنا التكييفات لو سمحتوا».. هكذا وجه الشباب ندائهم إلى حكومة الدكتور قنديل بعدما تزايدت وتيرة انقطاع الكهرباء والماء, واستنكارا لدعوة الحكومة المواطنين إلى قطع الكهرباء طواعية لساعتين يوميا تزامنا مع حملة النظافة التي دعا اليها حزب الحرية والعدالة , فقد نظم نشطاء مواقع التواصل الاجتماعى حملة موازية بعنوان «ازنق نفسك ساعتين» لحماية شبكات الصرف الصحي ومن أبرز تعليقات الشباب علي تلك القرارات ما يلى:
هيام ممدوح : بعد حملة ترشيد الكهرباء بقطعها ساعتين يوميا وحملة نظف الشوارع بنفسك ننتظر حملة ازنق نفسك علشان حماية شبكة الصرف الصحي.
خالد عبد العاطي : طب اقطعوا النور وسيبولنا التكييفات لو سمحتوا.
احمد عبد الشافي : تقريبا كده مشروع النهضة ده بيستهلك كهرباء وميه كتير.
نسرين طرابيه: الشعب كان في عهد مبارك بيحشش .. أما في عهد مرسي فبيحسس.
اكمل الزيني: قطع الكهرباء عن الاستاد في اولمبيات لندن لمدة دقيقة كاملة تحية للوفد المصري أثناء مروره.
أنور صلاح: اللي تلاقيه حاطط صورة بروفايله سودة ده مش حداد علي حد ابسلوتلي .. تلاقي النور قطع وهو بيتصور.
انجي اسعد : دار الافتاء المصرية تشيد بالمواطنين الصائمين بعدم رد صباح الخير بصباح النور لأنه أصبح مقطوعا اغلب الأوقات فلهاذا وان اردت رد الصباح بان تقول صباح النور المقطوع حتي لا تحتسب عليك كذبة وتفطر والله الموفق.
محمد مروان: من هنا ورايح وانت رايح تزور صاحبك او قريبك بدل ما تاخد تورتة في ايدك و الجو ده تاخدلك باكو شمع معاك.
هبة سليم: الكهربة بقت عاملة زي مسلسلات رمضان تيجي خمس دقايق وتقطع ساعة
. رامي الهندي: ما ينفعش كدة .. كل شوية يجيبوا النور .. قمة الفصلان
احمد علاء : دلوقت اللى يقولك إن سبب الحريقة ماس كهربائى قول له : يا بن الكداااابة.
محمد قاسم : معلش يا دكتور مرسي لو واحد النور قطع عليه وهو وخطيبته في الاسانسير مين هيشيل ذنب اللي هيحصل.
محمد علام : فين ايامك يا مبارك من كتر الكهربة كنت بتستخدمها في التعذيب.
سميرة التوني : تجارة الشمع بقت بتكسب أكثر من تجارة الحشيش.
محمد محمود : اتسحرنا في الضلمة قلنا ماشي لعبنا شطرنج في الضلمة قلنا ماشي انما اغسل اسناني بمعجون الحلاقة بدل معجون الأسنان لا بقة كده كتير .
عاطف الجندي : اغنية احمد عدوية الجديدة :ضلمة يا دنيا ضلمة.. ضلمة وتاهوا الحبايب.. ضلمة والكل ماسك شمعة .. مولد والنور فيه غايب .
مرام السويفي : الشعب يريد : كهربة.. حرية.. مية في الحنافية
لمياء محمود: مرة واحد النور مقطعش عنده.