مواطن قال لمواطن تانى: تصدق إن المواطن مرسى طلع لا مؤاخذة

المشهد الأول
على قهوة شعبية يحتسى رجل فى الخمسين من العمر شايا وبعد الرشفة الأولى تنهد تنهيدة قوية لدرجة لفتت انتباه الجالس أمامه وبادره قائلا:
ما تزعلش نفسك كلنا فى الهوى سوا البلد فى حالة وحشة قوى
الخمسينى: قصدك فى القرف والزهق والنكد والهم وووووو
الرجل التانى: يا عم وأخرتها "لا مؤاخذة "هنعمل إيه؟
الخمسينى: اللى خلصنا من "فرعون" يخلصنا من "هامان"
الرجل التانى: هامان ده جنبه ملاك تعرف اللى حارق دمى إنى انتخبته وكنت بادافع عنه
الخمسينى: ضحكوا علينا وقالوا ها ها
الرجل التانى: الشعب مش هايسكت إلا لما ياخد حقه
الخمسينى: اللى مزعلنى إن الناس فاكراهم من سلالة الصحابة
الرجل التانى: هو وظيفته مرسال بين الشعب والإخوان يعنى "لا مؤاخذة"؟
الخمسينى: دا هو اللى طلع "لا مؤاخذة "
الرجل التانى: تصدق لما باسمع خطاباته بحس إنه تلميذ فاشل مش حافظ الكلام يعنى هاهاها "لا مؤاخذة"
الخمسينى: عارف موضوع النهضة طلع إيه؟ برضه "لا مؤاخذة"
الرجل التانى: يا عم مصر محروسة لا هما ولا غيرهم يقدروا يضحكوا علينا خلاص كان زمان
الخمسينى: أنا هطلب قهوة.. أطلب لك إيه معايا؟
الرجل التانى: ماشى مظبوط
الخمسينى صارخا: لأ قهوة سادة.. يا راجل ده انت بتتكلم على واحد عشان تبلع لازم سادة.. ده أنا حرمت اللحمة والفراخ والسمك لحد ما السوء يرحل.. وأدينى صابر على جار السوء... ويا رب المصيبة .....
الرجل التانى: أعصابك سادة سادة يا سيدى ومتزعلش نفسك لاييجيلك السكر أو الضغط وانت لسه صغير
الخمسينى: نعم هو لسه من 3 شهور جانى السكر ومن شهر واحد بس حسبى الله ونعم الوكيل جانى الضغط وأعتقد والله أعلم إن الرعاش فى الطريق.
الرجل التانى: أنا لاحظت فعلا إن نسبة مرضى السكر فى البلد كترو بعد ما بقى فى القصر شكلة بجد "نحس"
وقاطعة شاب ملتح: اصبروا على البلاء
الخمسينى: بلاء؟ ده تفوق على المصايب والكوارث
الشاب: عفوا، هو حضرتك بتتكلم على مين ؟
الخمسينى: لا حول ولا قوة إلا بالله، الشاب جاله زهامير ولسه ده الشعب ده ياما هيشوف اشربوا قهوة سادة على شبابنا على كرامتنا واخذ يروح للجالسين بالقهوة اشربو سادة يا معلم سادة يا بيه
بعض الجالسين على القهوة: لا حول ولا قوة إلا بالله الراجل "مخه ضرب"
المشهد الثانى
عاد الرجل الخمسينى إلى الكرسى الخشب المتهالك ووضع يده على خده هامسا لنفسه: كلنا "لامؤاخذه" بس ..أعمل حزب أسميه "لا مؤاخذة"؟
الرجل التانى: والله فكرة حلوة أنا أول واحد معاك
الشاب: معلهش واضح إن الصورة واصلة غلط الراجل عنده طموح وعايز يخلى بلدنا أحسن بلد فى الدنيا
الخمسينى: روح يا بنى كفاية كدب انتم عايزين تضحكوا علينا ايه بعد النهضة، الطموح، حلو الشعار ده فكروا فى شعار تالت ورابع
بس كانت ومش هتعود صدقنى الشعب خلاص عرفكم "لا مؤاخذة"
الشاب: فعلا أنا معاك فيه غلط حاصل فى البلد بس ده مش معناه إن مرسى "لا مؤاخذة" نعطى له فرصة وبعدين نحاسبه صح
نظرة غيظ من الخمسينى إلى الشاب يا بنى ابعد عنى فرصة إيه اللى انت جاى تقول عليها كان زمان بطلوا كلام ينفع مع "الجمال والبغال" إحنا بنى آدمين افهموا
الشاب الملتحى: يا عمى
الخمسينى: تدخل معايا فى حزب "لا مؤاخذة"
فى سخونة الحوار يدخل بائع متجول يلا نهضة نهضة بخمسين قرش يا نهضة، يصرخ الخمسينى: إيه؟ هما عملوها بخمسين؟
البائع: يلا خلى الشعب يتنهض ال "3" بجنيه
الخمسينى منفعلا: اتنهض يا شعب مصر اتنهض كمان وكمان وادخل حزب "لا مؤاخذة" قبل ما يفوت الأوان
كل اللى فى القهوة يقول فى صوت واحد إن المواطن مرسى طلع "لا مؤاخذة"