من صاحب فتوى «السجاير تفطر الصائم»؟!

أمهات زمان من كتر الطيبة والرحمة كانت تقولك أنت علشان صغير تصوم لحد الضهر بس.. طب ينفع أشرب ياماما أنا عطشان أوى "إشرب بق واحد بس وماتكترش".
لما الواحدة تضربلها لبانة وتسأل: ماما نسيت وأكلت اللبانة دى كانت على الترابيزة بس بيتهيألى اللبان ما بيفطرش صح ياماما.. "صح ياحبيبة ماما وطالما كنت ناسية خلاص".
لو الواحد كان بيشرب سجاير أيامها ما كانش زمانه حايموت على سيجارة دلوقتي وكان ديتها إيه.. ماما نسيت وطلعت سيجارة من علبة السجاير ولعتها وشربتها بس رميتها في الطفاية في آخر نفسين كده أبقى لسه صايم صح "صح يا حبيب ماما"، ماما هو في آية أو حديث بتقول إن السجاير بتفطر ؟ "لا يا حبيبى ما فيش"..
ماما هو مين اللى قال إن السجاير بتفطر أصلًا "ما أعرفش يا حبيبى".. يبقى مافيش حد صح يا ماما ؟ "صح يا حبيبى" يعنى من حقنا نولع في الصيام صح؟ "عيب يا وله".. أقصد يعنى نولع في رمضان كله عادى؟ "يا واد جرالك إيه؟" أقصد يا ماما م الآخر قلة السجاير هي اللى فارقة معايا في الصيام..
ينفع أشرب سجاير وأكمل صيام عادى من غير لا أكل ولا شرب "ماشى بس سيجارة واحدة ولما تكون خرمان اوى مش عمال على بطال".. يا حلاوة أيام زمان وحلاوتك يا رمضان حتى لو من غير دخان.