-المرشد: إيه يا باشمهندس «خيرت»، ليه مش بتدعى على العيال بتوع المعارضة دول، ربنا ياخدهم ويريحنا منهم، انت عارف إنهم مخليين شكلنا وحش أوى. -خيرت: والله، من غير ما تقول فضيلتك، بدعى عليهم من فترة، ولا بيجرى لهم حاجة. -المرشد: لأ..يا باشمهندس، انت لازم تدعى على كل أطياف المعارضة، ربنا يخرب بيوتهم، ويفرق شملهم. -خيرت: هحاول يا فضيلة المرشد. -المرشد: مفيش حاجة اسمها «هتحاول»، انت تقوم دلوقتى من مكانك، وتتوضا وتصلى بتاع 200 ركعة، وخصص كل ركعتين، للرجالة اللى عاملين فيها معارضين وثوار، وتدعى عليهم بالويل والثبور وعظائم الأمور، ومتقلش مش فاضى تانى يا خيرت، عشان مزعلش منك، أنا قلت للشعب إنك مستجاب الدعوة، ومينفعش تطلعنى صُغيّر . -خيرت: ربنا يسهل فضيلتك. -المرشد: شكلك بتنفضلى يا خيرت، وده مش حلو، وكده هزعل منك. -خيرت: يعنى إيه بنفضلك، عموما أنا مش فاضى دلوقتى، أدعى على حد، وكمان مليش مزاج. -المرشد: يعنى إيه ملكش مزاج، انت لازم تقول لى: سمعا وطاعة، وتنفذ أوامرى. -خيرت: فضيلة المرشد، أرجوك بلاش صوت عالى، متنساش أنا بعمل إيه من أجلكم، أنا بتاع الفلوس يا صاحب الفضيلة، ولو كنت ناسى، أفكرك. -المرشد: فلوس، فلوس، فيه إيه يا خيرت، انت هتعايرنا واللا إيه، هى الفلوس، بتجيبها لوحدك؟، ما الجماعة بتساعدك فيها.. -خيرت: جماعة مين فضيلتك، أنا الجماعة، والجماعة أنا، واللا انت هتكبر عليّ؟ -المرشد: إيه يا خيرت، فيه إيه؟ شكلك ضارب ترامادول، واللا فيه إيه بالضبط؟ -خيرت: فيه عدس، أغرف لك؟! -المرشد: مالك يا خيرت، إيه اللى جري لك؟ عمرك ما كنت كده، إحنا اتحسدنا واللا إيه؟ -خيرت: بص يا فضيلة المرشد، أنا حاطط فى قلبى وساكت، وعامل احترام لك . -المرشد: حاطط فى قلبك من مين؟ -خيرت: من الجماعة كلها، واحد واحد، وأنا النظام ده مش عاجبنى. -المرشد: اهدى يا باشمهندس، ادعى بس انت على العيال بتوع المعارضة دول، ربنا ياخد أجلهم، وبعد كده نقعد، ونشوف إيه اللى مزعلك. -خيرت: لأ نقعد الأول، وبعد كده أدعيلك على اللى انت عاوزه. -المرشد: انت كده بتساومنى يا خيرت، وأنا مش متعود منك على كده؟ -خيرت: اعتبرها زى ما تعتبرها، أنا قلت لك اللى عندى. -المرشد: إيه طلباتك يا عم خيرت؟ -خيرت: انت عارف يا فضيلة المرشد إن أنا كنت أولى من الأخ مرسى برئاسة مصر. -المرشد: ما إحنا معارضناش يا خيرت، بس انت عارف اللعبة اللى عملها المجلس العسكرى، عشان يبعدك. -خيرت: ده كان زمان، إنما دلوقتى ممكن حاجات كتير تتغير. -المرشد: يعنى إيه المطلوب؟ -خيرت: أبقى أنا الرئيس. -المرشد: طيب إزاى؟ -خيرت: زى الناس، ولو وافقت، هدعيلك على كل اللى يزعلك. -المرشد: بس يا ابنى ده صعب. -خيرت: ابنك فى بطنك يا فضيلة المرشد. -المرشد: طيب ومرسى نوديه فين؟ -خيرت: وهى دى صعبة؟ زى ما ودينا غيره، ونتهم المعارضة والجماعة بتوع جبهة الإنقاذ باغتياله، وكده نبقى ضربنا عصفورين بحجر. -المرشد: تصدق فكرة جامدة طحن. -خيرت: اتفقنا. -المرشد: والتنفيذ هيبقى ازاى؟ -خيرت: دى لعبتى يا فضيلة المرشد.