هاشتاج «من عجائب البنات» يتصدر «تويتر».. فرانكو: «بتتكلم لغة إغريقية».. دينا: «تنزل تشتري بلوزة ترجع بشوز وبنطلون».. عمر: «تشوفهم من غير مكياج تقول إيه يا جمال ده».. وإيمى: «معنديش لبس خالص»

دشن مستخدمو موقع التواصل الاجتماعى «تويتر»، اليوم الأحد، هاشتاجًا جديدًا يحمل عنوان «من عجائب البنات»، تصدر أكثر الموضوعات تداولًا عبر الموقع، تفاعل معه الكثير من المغردين، معبرين خلاله عن بعض الملاحظات الغريبة لدى البنات، ومن جانبها رصدت «فيتو» أبرز التعليقات.
أحمد فرانكو: «إنها لما تشوف طفل حلو تلاقيها بتتكلم لغة إغريقية بوتى بوتى كميلة سغنتوطة إنت يا خلاسى.. لدرجة إن الطفل نفسه بيستغرب أجدع».
جهاد حسام: «إنها ممكن تكون زعلانة وبمجرد ما تنام وتصحي بتبقي زي الفل والضحكة على وشها.. ملبوسين».
عصام محمد: «مفيش عجايب للبنات.. البنات دول مخلوقات زينا بياكلوا كرنب وبيشربوا بيبسي وبيتكرعوا وبيجيلهم انتفاخات».
كوكا: «مبنعرفش إحنا عاوزين إيه بالظبط».
شيكا: «إن كرشتها حبتك وإن حبيتها كرشتك».
فيروز: «لما تقول لبنت متقوليش حاجة لحد.. البنت دي تقولها لصاحبتها وصاحبتها لصاحبتها وصاحبتها لصاحبة صاحبتها».
سارة: «تسريحات شعرنا».
عمر سعد: «إنك تشوفهم بالمكياج تقول إيه الجمال ده وتشوفهم من غير مكياج تقول إيه يا جمال ده».
فراولاية تويتر: «إنها بترخص نفسها مع اللي بتحبو».
محمد فرحات: «تلاقي نفسها فاضية تقوم تنضف البيت كله في أقل من ساعة وتطلب منها كوباية مايه تقولك انتو ما بترحموش».
ملك: «إنها ممكن تكونلك أمك وأختك وبنتك وصاحبك وأبوك في الوقت اللى إنت بتحتاجه».
سيد: «أنا بكرهو بكرهو بكرهو ده إنسان زبالة ومش عايزة أعرفو تاني أبدا الموضوع انتهى الحقي ده بيتصل ألوو إيه يا حياتشي».
فواز: «الكحل».
ميدو: «كائنات مفترية تجيد أخذ حقوقهم بكل بساطة فقط قليل من السهوكة مع كثير من البكاء المزيف».
مروة: «كلمة ممكن تقفل لها اليوم وكلمة ممكن تخليها مبسوطة طول اليوم».
ريهام هانم: «تنكد عليك علشان تصالحها ودي قمة الرومانسية».
ميكى: «عاوزاك تغير عليها بس متخنقهاش إزاي متعرفش».
نوفا: «إنها لو زعلت من حد بتعيط ولو زعلت حد برده بتعيط».
زيكو: «إنها بتحبك وبتكرهك في نفس الوقت».
آية: «تاكل كل حاجة بس تتعشي زبادي عشان متبوظش الدايت».
رنا: «لو ليك حاجة عند البنت.. قولها إنتى خسيتى».
خالد: «قدرتها على حكي نفس القصة بنهايات مختلفة».
دينا: «تنزل تشتري بلوزة ترجع بشوز وبنطلون».
إيمى: «عندهم لبس يكفي عشر بنات وفى الآخر تقف قدام الدولاب تصرخ وتقول معنديش لبس خالص».
رولا: «إنها لو زعلت بتتكلم بسرعة مليون كلمة في الثانية لمدة 3 إلى 4 ساعات وبعد ماتخلص تقولك خلينى ساكتة بقى أحسن».