ديالوج

فى لحظة غير عادية اجتمع الخيال مع الواقع تقابلت أدلة الاتهام مع الشهيد فى حوار طويل بدأ ومايزال مستمرا حتى ساعته وتاريخه.
الشهيد: أنا تعبان فى نومتي!
أدلة الاتهام: كنت عايز أخدم.. لكن مش معقول أزور أو أكدب وأدخل النار.. لكن أنت دلوقتي أكيد فى الجنة.
الشهيد: لكن أهلى واصحابي.. عايشين فى نار.. وممكن الناس تكره الحق والعدل بالاسلوب ده؟
الأدلة: وأنا ذنبى إيه.. اللى عندى قلته.. والقاضى فى النهاية بيحكم!
الشهيد: قوليلى يا أدلة هانم هو مين اللى بيجمعك؟
الأدلة: النيابة والشهود؟
الشهيد: ودمى اللى لسه فى الميدان وتحت مدرجات بورسعيد وشارع محمد محمود ومجلس الوزراء؟!
الأدلة: يعنى يرضيك ندور على حقك وتظلم بريء!
الشهيد: لا طبعا بس كل واحد يأخد حقه!
الأدلة: عليك نور وهيأخد حقه ازاى ومفيش فى ايد القاضى دليل اكيد يحكم بناء عليه!
الشهيد: يعنى اذا كان اللى طبخوها ودبروها ومولوها وعملوها وقلووظها.. طلعوا منها كلهم فى مهرجان «البراءة» للجميع.. يبقى مين اللى قتلني؟
الأدلة: طيب حاول تفتكر معايا.. جايز تكون انتحرت وانت مش واخد بالك.
الشهيد: طيب أنا انتحرت وباقى الشهداء والمصابين؟
الأدلة: مش يمكن اتعرضوا لحوادث وجرايم ملهاش علاقة بالثورة واللى جرى فيها؟ وأظن حصلت؟!
الشهيد: حرام عليكى الدنيا كلها كانت شايفة المولوتوف والخيل والبغال والجمال والحمير والرخام المكسور والخرطوش.
الأدلة: المهم الدليل؟
الشهيد: واضح إن حد لعب فى دماغك وضميرك يا أدلة هانم!
الأدلة: دى إهانة لايمكن أقبلها وأنا معروف عنى النزاهة!
الشهيد: وأنا قبل استشهادى كان معروف عنى حبى لوطني.
الأدلة: محدش يقدر يقول ربع كلمة!
الشهيد: وبعدين حقى فين والأدلة غايبة.
الأدلة: ما أنا قدامك أهه!!
الشهيد: طيب ممكن حضرتك تروحى المحكمة وتقفى قدام القاضى وتقوللى الحقيقة؟
الأدلة: مفيش مانع- لكن خلى النيابة تيجى تأخدني!
الشهيد: وليه أنتى ماتروحيش للنيابة؟
الأدلة: لا يا حضرة الشهيد أنا طول عمرى شعارى معروف «اللى عايزنى يجينى أنا ما باروحش لحد»!
الشهيد: يبقى أنا اللى أروح؟
الأدلة: بس ياريت وأنت رايح تعدى على مقر الحزب الوطنى المحروق.. وعلى نيابة الأزبكية وكام محكمة ونيابة وأمن الدولة من اللى اتحرقوا.. وتقرأ الفاتحة وأنت ماشى للعدالة!!