قولي هتعمل إيه ..

قولي هتعمل إيه.. سلمى عبد العال كحيل
قولي هتعمل إيه؟؟؟
قولي هتعمل إيه لما احكيلك قصة حية
قصة بتنادي وجاية
قصة من الاتحادية
كلنا عارفنها إيه هي
قصة المناضل اللي على كتفه الكوفية
وإيده شايلة كاميرا وحقيقة مستخبية
كان رايح ضد ظلم الإخوانية
كان بيقول سلمية سلمية
كان شاب ثورجي رافض العبودية
ورسالته واضحة قايله
انا رايح أتظاهر
وجوايا قلب طاهر
حالف لأشيل الهم وكل قلب قاهر
حالف لأمحي الانقسام اللي بينك وبيني
حالف لأجيب الحق حتي لو مرت سنيني
حالف لأرجع عدالتك بعرق جبيني
وان مصونتش أرضك تعالي واحبسيني
انا شاب مصري أصلي تعالي احضنيني
شغلتي في الأصل صحفي وترابك حاميني
كان نفسي أبقى عايش بين ناسك وتسيبيني
أجيبلك الحقيقة بقلبي قبل عيني
ما أنا شاب مصري أصلي واسمي الحسيني
قولي هتعمل إيه ؟؟؟؟
لما سمعت الوطنية دية
من شاب قلبه نظيف كان كله انسانية
قولي بتبكي ليه كل الدموع دية
أنا لسه قلت حاجة دا دي بس الشخصية
أومال لو دخلت في القصة الأصلية
قولي هتعمل ايه؟؟؟؟
أقولك الحكاية والله من غير ماحور
في يوم الحسيني نزل كان وشه منور
خد كامرته ومشي وابتدى يصور
يبص شمال ويمين وابتدى يدور
بيدور علي الظلام والكلام المزور
عشان يمحيه والنور ينور
وفجأة إحساسه قاله النور بينور
لف بكامرته شاف ذئب ماسك سلاح
صور بسرعة وقال ده بجد ولا مزاح
قال الحمد لله هيبان كل الجراح
قال ابتديت اعرف الحقيقة
ماشلش عينه لحظة من ع الكاميرا الجريئة
صور كل الذئاب بعينه البريئة
شاف ذئب ماسك سلاح يضرب هنا وهناك
واقف بكل جرئه وكأنه ذئب ملاك
قال إيه يدافع عن دين ويقول الله حماك
واستغرب الحسيني ولكنه كان مكير
صور بكل شرف وبحرفة وبضمير
صور كل الخراب
والظلم والإرهاب
جاب صاحبه جمبه شاهد
وقاله صورت بقلب جامد
صورت كل الظلم وربي كان الساند
صحبه استعجب وقال
ده خراب ما فيش مجال
واللي هيطلع منها ده يبقى من المحال
وهو بيوري صاحبه ع الحقيقة المرة ديه
ايشي منهم ملتحيين ولابسين جلابية
وايشي منهم ملثميين ومعاهم بندقية
ومنهم متزمدين ساحلين مصراوية
وف عز كل ده فرحانين الشباب
عرفوا كل ذئب وعيلته من الكلاب
ده ياعيني جاب الصورة من اللحية للشراب
وفي لحظة فرح مع بسمة ندية
طلعت رصاصة خاينة حية مدارية
طلعت رصاصة مدفونة بعدم الوطنية
طلعت رصاصة مخنوقة بظلم وعبودية
طلعت رصاصة لا تعرف حق ولا حرية
بتقوله وهي جاية
لازم هنخلص منك عشان الكاميرا ديه
ده أمر لازم ينفذ من زعيم البلطجية
دي الكاميرا ديه فيها مصايب مدارية
دي فيها كل حاجة عالشعب مستخبية
تيجي انت ياصغير تراجعنا اماكنا اللي هي
ورشقت الرصاصة في الراس الثورجية
ماهي جاية من كلب ميلشية إخوانية
لا يعرف حرام ولا حتي إنسانية
يعرف دم وخراب وبنادق الية
وسال دم الشهيد قدام الاتحادية
قدام الاغبياء وشباباها الثورجية
اه اه ده بيت رئيس المصراوية!
اه اه مستغربش ده العادي الأيام دية!
وراحت معاك ياحسيني الحقيقة اللي هي
صرخت عيونا دموع غير منتهية
علي شاب كان هدفه حق وكرامة وحرية
ودلوقتي رسالة ليك يارئيس الجمهورية
يا أبو لحية وإنسانية يا رئيس مصر البهية
قولي هتعمل إيه؟؟؟؟؟؟؟؟؟؟؟؟؟؟؟
قولي هتعمل إيه لما تسمع قصة بالوحشية دية؟
قولي هتعمل إيه لما تلاقي أم جاية بصرخة قوية؟
بتقولك حق ابني فين يارئيس المصراوية
مين قتلوا ابني بالرصاصة دية
أنا لاعايزة معاش ولا تعويضات مالية
ولا عايزة خطاب ولا كلمة تليفزيونية
أنا عايزة قصاص وعدل وحرية
وهقول رسالة ليه ومحدش هيرد عليا
لكن فوضت أمري لرب الملكوت
لاجيبلك حقك يا بني قبل السنة ما تفوت
من السفلة اللي قتلوك حتي لو انا هموت
ورسالة من مصر ليكي يا أم الشهيد
لنجيبلك حق ابنك بشعبها العتيد
رسالة من مصر ليك يابن الصعيد
لنكمل الوصية وثورة من جديد
وهنجيب حقك ياضيف يابطل
وهنكمل الوصية مهما حصل
لحد ما تكمل الثورة ونرجع الشعب اللي انفصل
بدعيلك بالصبر يا أمي
وكل مصري مديونلك بدمه ودمي
ووعد ياحسيني ياللي ملكش زي
لتفضل جوانا في كل يوم جاي
هتفضل في قلبنا بطل وحي