حسام مؤنس ل«الدولة»: صححوا الأخطاء ولا تصادروا الحريات

طالب حسام مؤنس، المتحدث باسم التيار الشعبي، الدولة بعدم تكرار الممارسات القديمة، والتعنت مع الأجيال الجديدة.
وكتب «مؤنس»، عبر صفحته الشخصية على موقع «فيس بوك»، في الساعات الأولى صباح اليوم الأحد: «شباب يتقبض عليهم، فشباب تانيين يحسوا بالظلم، فينزلوا يتضامنوا معاهم، فيتقبض عليهم، فناس أكتر تحس بالظلم، فبرضه ينزلوا يتضامنوا معاهم، فيتقبض عليهم».
وأضاف: «طول ما دايرة الظلم بتوسع.. وطول ما تطبيق القانون الظالم المستبد أولى من تطبيق العدل.. وطول ما الدولة بتفرض هيبتها بالقوة مش بالعدل والحوار والقبول.. طول ما العند هو العقلية اللى بتحكم.. وطول ما في إصرار على عدم الاعتراف بالأخطاء وتصحيحها.. وطول ما الممارسة زى ما هي مبتتغيرش.. وطول ما احنا بنرجع لورا.. متستنوش من الجيل ده حاجة إلا المزيد من العناد، مزيد من الإصرار، اتفقوا أو اختلفوا معاه مش ده المهم، المهم أنه جيل مش بيخاف ولا هيقبل تنكسر إرادته.. لا بخوف ولا بسجن ولا بظلم ولا بشعارات كذابة.. عايزين استقرار فعلا ؟ عايزين البلد تمشى لقدام فعلا؟.. صححوا الأخطاء ومتصادروش الحرية ومتعندوش مع الأجيال الجديدة ومتستمروش في تكرار الممارسات القديمة.. افهموا إن البلد اتغيرت.. افهموا إن المستقبل جاى مهما حاولتوا ترجعوا الماضى».