ورقة من ملف مفاوضات «القائمة»

- سلامو عليكو..
- عليكم السلام ورحمة الله وبركاته.. اتفضلوا.
- يزيد فضل سيادتك.. والله إحنا جينا فى الميعاد مظبوط، من بعد صلاة الظهر وإحنا منتظرين فضيلتك برة..
- معلهش يا جماعة سامحونا.. كنا بنصلى العصر.
- مافيش مشكلة فضيلتك.
- أهلا وسهلا.
- أهلا بفضيلتك..
- تشربوا إيه.. تاخدوا شوية نعناع حلوين كده؟
- تشكر فضيلتك شربنا النعناع برة.
- طيب، إن شاء الله جهزتم أسماء المرشحين بتوع حزبكم.. بالمناسبة هوه اسمه إيه؟
- اسم مين فضيلتك؟!
- حزبكم.
- «الوردة البيضاء»..
- ده اسم الحزب ولا الفيلم؟!
- لأ، ده الحزب لو تكرمت فضيلتك..
- OK.. ع البركة إن شاء الله.. طيب معاكم أسماء مرشحيكم؟
- إيوه معانا فضيلتك.
- كام واحد؟
- خمسين فضيلتك.
- عندكم خمسين عضو فى الحزب؟! ما شاء الله..
- فضيلتك إحنا جايبين أسماء خمسين مرشح علشان تتفضل فضيلتك وتحطهم لنا فى القايمة..
- أحطهم لكم فى القايمة (!!) ليه أنتم فاكرين القايمة دى إيه.. ملجأ أيتام؟! اسمعوا.. أنا ماعنديش ليكم غير خمس أماكن.. تاخدوهم ولا بالسلامة؟
- طب فضيلتك، اتكرم وخليهم لنا سبعة علشان الأولاد..
- هما خمسة، ماعنديش فصال.. إذا كان OK ماشى، ما أوكهشى يبقى بالسلامة ماتضيعوش وقتى ووقتكم ووقت «الجماعة»..
- خلاص فضيلتك اللى تجود بيه الجماعة إحنا تحت أمرها.. زى بعضه خمسة خمسة.
- طيب قل لى أساميهم، وهات لى بكرة 100 ألف لكل واحد منهم.
- 100 ألف إيه فضيلتك؟!
- 100 ألف جنيه يا أستاذ، أمال ح نحطكم ع القايمة وتاخدوا النيابة والحصانة مجانا كده، مش فيه مصاريف دعاية ومطبوعات وبلاوى زرقاء كتير.. أنتم فاكرين قايمتنا سبيل «أم عباس»؟!
- على فكرة أنا اسمى «عباس»..
- عاشت الأسامى يا سيدى..
- طيب فضيلتك ما تهز لنا المبلغ ده شوية، سيادتك عارف الظروف.
- لا ظروف ولا جوابات.. تدفعوا تدخلوا القايمة، ماتدفعوش يبقى كل سنة وأنتم طيبين؟
- وفضيلتك بالصحة والسلامة.. يعنى المرشحين الخمسة بتوعنا عايزين لهم «نص أرنب» مش كده؟
- أيوه..
- ومافيش «ديسكاونت» فضيلتك؟
- لأ.. مافيش «ديسكاونت» ولا بطيخ..
- طيب ممكن تخليهم لنا فضيلتك ثلاث مرشحين بس علشان النقدية مش متوفرة قوى الأيام دى..
- زى بعضه، أما نشوف آخرتها.. قل لى أسامى التلاتة خلصنى عايز ألحق أخطف صلاة المغرب..
- أنا بصفتى رئيس الحزب وأخويا سيد سيد عباس نائب رئيس الحزب ومراتى مدام رانيا النائب الثانى.
- قل لى اسمها الثلاثى..
- تفيدة عويس ال..
- أنت مش قلت رانيا..
- أيوه ماهى «رانيا» هى «تفيدة»..
- وده ليه.. علشان الحرب خدعة؟!!
- أيوه.. بس يا ريت فضيلتك تقولنا ح تتكرم وتحطنا ع القايمة فى ترتيب إيه؟!
- سيبنى وأنا أختار لكم ترتيب على ذوقى..
- والنبى قول لى دلوقتى فضيلتك..
- اللهم صلى وسلم عليه، شوف يا سيدى.. أنا عندى مكان فى المنيا فى التاسع، وفى دائرة «شبرا الحيط» فيه مكان تانى فى العاشر.. وفى دائرة «حلايب وشلاتين» عندى كرسى فى الخمستاشر.
- فى الخمستاشر!!
- إيوه.. الهوا فيه يرد الروح.
(طبق الأصل المسجل للجلسة)