القرموطي: ترامب اغتصب الكل (فيديو)

استنكر الإعلامي جابر القرموطي، مساء الخميس، قرار الرئيس الأمريكي دونالد ترامب، اعتبار القدس عاصمةً لإسرائيل، ونقل سفارة الولايات المتحدة من تل أبيب إليها، قائلًا: «قرار ترامب نسخة جديدة من وعد بلفور لليهود منذ 100 عام، ولكن هناك خنوع وخضوع منا أكثر، وأتحدث عن 22 دولة عربية ولا استثني أحدًا».
أضاف القرموطي، خلال تقديمه برنامج «آخر النهار»، المُذاع عبر فضائية «النهار»، «أنا مش طايق أشوف واحد أمريكي قدامي، أنا كرهت جاردن سيتي بسبب إن فيها السفارة الأمريكية، الراجل ترامب ده امبارح طلع الواحد من هدومه، والله بدخل بيتي مكسوف، ولادي ومراتي ليهم حق يطردوني من البيت، لأني قليل الحيلة وعاجز تمامًا، لا أنا ولا أنت ولا أي واحد فينا عرف يحمي بيته».
تابع: «إحنا ليه عرب مش بنتحد؟ ليه بدل الفُرقة مش بنبقى واحد؟ ليه عقلية العرب مش بتتغير؟ نفس العقلية اللي كانت موجودة وقت عهد بلفور 1917 وأسوأ، احترموا نفسكوا شوية يا عرب، إحنا نايمين، إحنا ولا حاجة وملناش قيمة، إحنا اغتُصبنا خلاص، الدول العربية هتعمل اجتماع السبت الجاي.. هتطلعوا تقولوا إيه؟ لكن هنعمل إيه كان لازم كل واحد فيهم يعمل المكياج بتاعه قبل ما يجي، خليكوا ما خلاص خلصت».
واصل: «إحنا منبطحين ومُغتصبين ونيّام، أنا ماشوفتش عالم غاوية اغتصاب زيّنا، اغتصاب أرض وعِرض وشرف وكرامة وسياسية وقوة ونفوذ ومال، ماكفناش 100 سنة على وعد بلفور عشان نرجع أرضنا وكرامتنا، عملنا إيه في ال100 سنة؟ التاريخ هيحاسبنا كلنا، إحنا شوية هبوّ، ومش هينفعنا غير إننا نتوحد ونقرب من بعضنا، هو أخد القرار لأنه عارف إننا مش هيكون لنا أي رد فعل».
استكمل: «الواد ترامب هبش الكل امبارح، والله اغتصب الكل.. مجلس الأمن على الأمم المتحدة على الجامعة العربية على منظمة التعاون الإسلامي، ماسبش حاجة، إحنا أمنة خُنوع، يا عم صحي الأمة العربية.. مفيش أمة عربية، طيب اقلبها على الجمب اليمين.. مفيش فايدة.. طيب نيّمها على بطنها.. مفيش فايدة.. هي نايمة وبنام أكتر وفوقنا 50 بطانية ولا حد فاهم أي حاجة، إحنا أمة فاشلة».
وأعلن الرئيس الأمريكي دونالد ترامب، مساء الأربعاء، اعتبار بلاده القدس عاصمةً لإسرائيل، مطالبًا الخارجية الأمريكية بنقل سفارة الولايات المتحدة المتواجدة بإسرائيل إلى القدس بدلًا من تل أبيب.