القرموطي: الإخوان بيقولوا مابعناش لكن السيسي باع.. «شعبيتك تقل مع كل أزمة»

قال الإعلامي جابر القرموطي، اليوم الثلاثاء، إن مصر والسعودية اشتركتا في أزمة جزيرتي «تيران وصنافير»، مؤكدًا أن الحكومة المصرية لا تستطيع إدارة الأزمة عقب إعلان وقوعهما في المياه الإقليمية للمملكة.
أضاف القرموطي، خلال تقديمه برنامج «مانشيت»، عبر فضائية «أون تي في»، «أنا حتى الآن مش مصدق أن الجزيرتين سعوديتان، نحن في أزمة لأننا لدينا إدارة لا تصلح لإدارة أزمة، إدارتنا نفسها أزمة، العلاقات بين مصر والسعودية تفخخت بعد أزمة الجزيرتين، كنا في حِل عن هذا اللغط لو هناك إدارة جيدة للأزمة، نحن لا ننجح في إدارة أي أزمة حتى الآن».
تابع: «أنا انتمائي الأول والأخير للجيش، وليس لرئيس الدولة، حتى وإن كان الرئيس ذو خلفية عسكرية سابقة، شعُر البعض إن هناك نوع من المقايضة بين مصر والسعودية، واللي بينتقدوا الموضوع مش خونة ولا عملاء، ده حتى ( آسف يا ريس ) بينتقدوا، وصلنا لمرحلة إن في حاجات عملها مبارك الرئيس الحالي ماعملهاش، وصلنا لمرحلة إن الإخوان وآسف يا ريس بقوا متعاطفين مع بعض، بيقولوا إحنا مابعناش لكن السيسي باع».
وعن هجوم الإعلام المستمر على الرئيس المعزول محمد مرسي، إبان ولايته، في مقابل ليّنه مع الرئيس عبد الفتاح السيسي؛ قال «القرموطي»: «الإعلام بيتحدث من خلال نبض الرأي العام، الفكرة مش تويتر وفيسبوك وبس، الناس في الشارع لسه متمسكة بتطور الدولة المصرية في وجود السيسي، بس التمسك مبقاش بنفس النسبة بتاعت زمان، النسبة بتقل، مع كل أزمة النسبة بتقل أكتر، والسيسي ملوش حق يزعل من الانتقاد، لأن الخطأ من مؤسسات الدولة، إنت اللي إديت فرصة للإعلام إنه يفضل في نفسه كده ويجيب القاصي والداني ويرتفع سقف النقض.. ليه يا ريس؟».
استكمل القرموطي مخاطبًا الرئيس: «هل حضرتك راضي عن إدارة ملف تيران وصنافير؟ أشك أن حضرتك راضي، هل حضرتك راضي عن إدراة ملف ريجيني؟ أشك، هل حضرتك راضي عن إدراة ملف الطائرة الروسية؟ أشك، هل حضرتك راضي عن إدراة ملف سد النهضة؟ أشك، لكن لو حضرتك قولت إنك مش راضي هتفرق جدًا معانا، إنت مش قولت ماتسمعوش غيري، أسوأ ما في أزمة الجزيرتين المفاجأة يا ريس».