عودة الرجل البلوفر

وأخيرا وبعد طول استفتاءات وتكهنات، التعلب فات فات والفريق أحمد شفيق يبدو أنه سيترشح فى الانتخابات.. شفيق مين؟ يا نهار طين.. شفييييق يا رااااجل.. أهااااه.. شفيق اللى كان لما اااا مبارك يتزنق يجيبه.. شفيق اللى كان لما ااااا يتكلم عن الثورة يقول لك حركة.. شفيق اللى استخبى يوم موقعة الجمل وترك أولادنا وإخوتنا يموتون ويضربون، ثم خرج بعد فشل موقعة الجمل ليعلن أنه ماكانش يعرف، وأنه كان فى اجتماعات.. شفيييييييق يا راجل.. شفيق اللى لما حب يجيب وزير داخلية جاب محمود وجدى وعمل وزارته من الفلول. شفيق اللى أمن الدولة كان مستريح وهو موجود ومستكنيص وآخر حلاوة.. ولما قدم استقالته عرف أمن الدولة بورطته، وزوال الظهر الذى يسنده فحرق المستندات وفرم الملفات وأفسد السيديهات وأبوك السقا مات.. شفيق يا رااااجل هيرشح نفسه فى الانتخابات.. شفيق اللى قتل واتقتل كذا مرة ولسه عايش.. شفيق اللى لما كان يحب يتدفى يلبس بلوفر.. وكمان كحلى. زغرطى يا مصر فى ليلتك الكحلى دى، ومبروك عودة الرجل البلوفر، ومش ناقص غير سليمان أجندة عشان تبقى الثورة حققت كل أهدافها.. ومانجيلكوش فى ثورة.