الأهلي اليوم : الأهلي يتعاقد مع صفقة ضعيفة لتدعيم خط دفاع الفريق

الأهلي اليوم : الأهلي يعاني من أزمة في مركز قلب الدفاع ال CB ويحاول التعاقد مع محمود متولي مدافع الإسماعيلي ، والسؤال هو هل متولي اللاعب الأنسب او اللاعب Class A هيمثل إضافة كبيرة للفريق ؟ الأجابة أكيد وبشكل قاطع لا . محتاج تشوف هنا اللاعب فى مبارايات على المستوى دة زى مازيمبي ضد الاسماعيلي فى لومومباتشي كان مستوى اللاعب ايه. اة فى اخطاء لفريقه جماعيا بس هو على المستوى الفردي فى ماتش زى دة او قدام الإفريقي او شباب قسطنطينة كان تمركزه عامل ازاى تحركاته ارقامه الفردية وحاجات تانية كتير. طيب هل فى الدوري اللى هو اقل صعوبة ارقامه بعيده ومييزه عن لاعبين زى ياسر ابراهيم و ايمن اشرف او ربيعة ! .

الأهلي اليوم : ياسر ابراهيم و محمود متولي ، على المستوى الفردي هنقارن بينهم على شقين . اولا الشق الدفاعي وثانيا التدرج بالهجمة والتمرير .
الأهلي اليوم : دفاعيا هنلاقي لاعب زي محمود متولى متوسط نجاحه في الفوز بالكرات الثنائية الهوائية نسبته 48 % بالمقارنة بياسر ابراهيم 56 % يعني ياسر بيتفوق . على مستوى ال tackles الناجحة هنلاقي ان محمود متولي متوسط نجاحه فيها 22 % وياسر ابراهيم 38 % يعني ياسر افضل .
الأهلي اليوم : على مستوى افساد تمريرات المنافس والتشتيت للكرة محمود متولى 7 محاولات ناجحة فى المبارة وياسر ابراهيم 8 يعني ياسر بيتفوق . ال blocking للتسديدات محمود متولى 0.18 لكل 90 دقيقة وياسر ابراهيم 0.40 لكل 90 دقيقة يعني ياسر بيتفوق . ارتكاب المخالفات محمود متولي 1.85 مخالفة في المباراة وياسر ابراهيم 1.10 يعني ياسر بيرتكب مخالفات اقل .
الأهلي اليوم : على مستوى التمرير وبناء الهجمة هنلاقي متوسط دقة التمرير الأرض عند متولي 77 % بالمقارنة بياسر 84 % يعني ياسر بيتفوق . التمرير الطولى عند متولى دقته 55 % عند ياسر دقته 56 % يعني ياسر بيتفوق . التمريرات الامامية عند متولى اقل من ياسر ودقة ياسر فيها 77 % بالمقارنة بمتولى 66 % يعني كمان ياسر بيتفوق فيها ، دة غير ان ياسر افضل كتير في التمركز والتغطية دة معناه إن محمود متولى لو هو مش اقل من اللى موجود فهو مش فارق كتير