خلي بالك من الكمين يا شعبولا!

يوميات مواطن مفروس

بعد أن شارك المطرب الشهير شعبولا في حرب انفلونزا الفراخ وحقق انتصارا ساحقا حيث قامت النسوان بتسليم الفراخ اللي كانت لابدة تحت السرير إلي المخبرين وهي تزغرد وتغني: يا فرختين علي فرختين.. راحوا الاتنين في الوبا وأصبحت مصر لأول مرة البلد الوحيد اللي انفلونزا الفراخ قامت بعملية انتحار جماعي خوفا من شعبولا.
والآن جاء الدور علي البرادعي ليشن عليه شعبولا حربا شعواء ولا حرب داحس والغبراء علي اعتبار أن وجوده في مصر يهدد الاستقرار الاجتماعي والسياسي والعاطفي كمان بالإضافة إلي أنه نووي مما يشكل خطرا داهما علي النسوان الحوامل وإللي بتتوحم كمان ولذلك قام المطرب المشهور- بعد أن بخ بختين جامدين وفرد الجلابية- وغني: مش هانتخب البرادعي ولاحتي في الخيال.. الريس لسه كويس والصحة عال العال .. كبير وعنده خبرة ويعرف حاجات كتير وأهل زمان قالولنا ان الكبير كبير.. مش أي واحد يحكم بلد النصر.. غير حد يكون عارفنا وعايش علي أرض مصر الناس عايزة الأمان في حياتها وأكلها.. وانت في كل أزمة نلاقيك بتحلها.. وهيييييه!
وطبعا.. من حق شعبولا الا ينتخب البرادعي أو أي واحد خلقته شبه مكوة الرجل فهو مواطن مصري يمتلك حرية الرفض والقبول من أن البرادعي أعلن أكثر من مرة أنه لن يرشح نفسه، خاصة بعد أن سمع أغنية شعبولا: خلي بالك من الكمين.
لكن المشكلة التي فاتت علي المطرب المشهور وهو بيخ هذه الاغنية أنه ضد البرادعي وجمال مبارك أيضا لأن الريس كويس والصحة عال العال وربنا يديله الصحة.. يعني الآخ شعبولا.. خد الاتنين وش مكوة في نفس واحد وعليه أن يتدارك الموقف ويبخ أغنية جديدة تؤكد.. وبعد عمر طويل: جمال جاي ياليل.. وهييه ثم.. بما ان سيادة الريس بيحل كل الأزمات؟! أمال الهم والغلب اللي احنا فيه ده.. جاي منين ياشعبولا؟!
محمد الرفاعي