نكت البابا شنودة على اليهود و الصعايدة و الكهنة

انتشرت بين موبايلات الشباب القبطي مقاطع صوت لنكات ألقاها البابا شنودة الثالث في عظاته وبعض ردوده «الكوميدية» علي أسئلة الناس والتي حملت اسم «قفشات البابا».
ويحتل الصعايدة والحاخامات اليهود المركز الأول من نكات البابا الذي يعد أول من أطلق النكات علي الحاخامات اليهود في مصر.
وهو البطريرك الوحيد من بين 117 بطريركاً في الكنيسة القبطية الأرثوذكسية عشق النكتة ويحرص علي قولها في عظاته الأسبوعية لدرجة أنه قال «الناس كانت فاكرة إني لما هبقي بطريرك هبطل ضحك.. بس ما قدرتش».
كاهن وشيخ وحاخام «رجل الدين اليهودي» ماشيين مع بعض فسألهم شخص إزاي هتقسموا الفلوس بتاعتكم بينكم وبين ربنا؟ الكاهن قال «أنا هعمل دايرة كبيرة علي الأرض وجواها دايرة صغيرة وهرمي الفلوس فيها واللي هيجي علي الدايرة الكبيرة من نصيب ربنا وأنا الدايرة الصغيرة.. والشيخ قال: أنا هدفع الزكاة.
والحاخام قال: «أنا واثق ان ربنا كبير، وقادر علي كل شئ وفي ايده كل شئ علشان كده أنا همسك الفلوس بإيدي وارميها له كلها لفوق؟ يأخد اللي ياخده وينزللي الباقي.
وعن مصاريف الإكليل «رسوم الزواج التي يتم دفعها للكنيسة قال له شخص إنها غالية فرد عليه «أحسن حاجة إنكم تدفعوا اللي تقدروا عليه وتكتبوا بالباقي شيك أمانة للكنيسة وتبقوا متجوزين شكك».
لأن القسيس لما يكون مستريح من الناحية دي يصلي ان حياة العروسين تكون حلوة؟ لكن لو «دققتوا عليه»، مين عارف في سره هيقول إيه..؟
وسأله شخص ماذا يفعل لأنه فقد جزمته في الكنيسة؟!.. فرد عليه «لما تيجي الكنيسة تتناول «طقس كنسي أثناء اقامة القداس» تعالي بأقدم جزمة عندك!.
وقال نكتة عن خوري - شماس - في الشرق الأوسط فقال كان خوري في الكنيسة فقال للناس إيش ده اللي بيحصل وسيطكم؟ إن بعضكم بيسب الدين لبعضكم ما يجوز هذا الكلام، شوفوا تلاتة بالله العظيم اللي فيكو بيسب الدين لأخوه أنا هسبله دين أبوه!.
وعن الكهنة قال «مايصحش إن الكاهن يدخل بالموبايل في الكنيسة أثناء القداس الإلهي لازم يسيبه في البيت، وإلا وهو بيصلي ويقول «يا الله العظيم الأيدي «صلاة داخل القداس».. بعد إذنك يا رب أرد علي التليفون وأجيلك شويه!
ورد علي سؤال آخر بخفة ظل فسأله شخص ماذا أفعل في النسيان دائماً أنسي، أدخل الكنيسة أسمع القداس والوعظة وأحفظ ترانيم ومتي أخرج أنسي كل شئ ولا بفتكر حاجة..!
فرد عليه «ما أنا خايف أقولك الإجابة «تنساها».. واحد بيسأله أنا بنام في اجتماع قداستك أعمل إيه؟.. فرد عليه «فكرني أعمل اجتماع وأنت صاحي».
واحد صعيدي صرخ بصوت عالي وقال له أنت «جاموس» يا سيدنا «يعني قاموس» فرد عليه وقاله الرك علي العجول «يقصد العقول».
سأله شخص أنا عايز أتجوز بس عندي 55 سنة؟ رد عليه: إذا كان سنك 55 سنة يبقي لازم تتجوز أم 44.
مذيع سأله وقاله صحيح يا سيدنا ما تردد أن الأقباط والكنيسة هتعمل دولة خاصة بهم في أسيوط؟ فرد قائلاً: إزاي الكلام ده؟ احنا عندنا أساقفة كتير أوي هنوزعهم إزاي علي أسيوط؟! واستطرد ضاحكاً ممكن نخلي كل أسقف علي حارة وممكن نسميهم الآباء الحواريين.
سأله شخص.. يا سيدنا الشيطان دايماً بيحاربني ويخليني أعمل الخطيئة.. فرد عليه.. «حاول تتفاهم معاه وقله «ابعد عني يا شط شط!.
سأله صعيدي.. يا قداسة البابا أنا صعيدي وبلديات قداستك وجاي مصر علشان أسأل سؤال واحد هل في يوم القيامة هانقوم صعايدة زي ما احنا ولا لع؟ فرد عليه في الدينونة «اليوم الآخر» مش هتقوم صعيدي ربنا هايكون صلحك علي الآخر؟.