قصيدة "يا ولاد بلدي " للدكتور هاني أبوالفتوح

يا ولاد بلدي
عندي سؤال كده بالبلدي
إيه دلوقتي إتغير فينا
ليه مابقاش فيه حاجة تِرضينا
ليه إتفرقنا فُراق غَرَّقْنَا
وحتى يِغَرَّقْ ألف سفينة
ليه ورا ليه بسألها لنفسي
وبسأل سامح وأسأل مينا
وأسأل طه محمود ومحمد
اللي اتسموا بإسم نبينا
.......................
وأسأل حتى الأرض الصحرا
وأسأل حتى رملة سينا
وأسأل أرض الريف الخضرا
اللي بخيرها مزروعة فينا
وأسأل شمس بلادي الطاهرة
في عز الشتا طالعة تدفينا
وأسأل نيل عايشين على خيره
ونبعه الصافي اللي بيروينا
وأسأل حتى قناة محفورة
بدم أجدادنا عشان تِدِّينا
والبحرين لما بْيِبْكُوا
من أعمالنا ومن بلاوينا
كل دا لو ما بْيِجْمَعْ بيننا
هنجيب إيه تاني يِجْمَعْنَا
وللا منين سما هتغطينا
.....................
إيه غيرنا وإيه فَرَّقْنَا
وإيه خلانا ننسى ماضينا
هي الثورة عشان نتفرق
ولا نكون كلنا إيد واحدة
نحط إيدينا في إيد بعضينا
إزاي مطامعنا تِفَرَّقْ بينا
وتيجى تِضَيَّعْ أحلى ما فينا
عشنا سنيننا بِنقْسِمْ لُقمة
ونِقْسِمْ نسمة هواء تحيينا
وعِشْنَا نقول عالوحدة حياتنا
وكانت الفرقة أعدى أْعَادينا
...................
ألف خسارة لَمِّا في لحظة
بننسى الغالية و بأنانية
تزيد مآسيها مع مآسينا
ودم يسيل عالأرض الطاهرة
وسط مظاهرة
كأن دمانا رخيصة علينا
محروق كل مطامع الدنيا
على مناصبها اللي تخلينا
نقتل بعض وناكل بعض
ونحرق قرية ويَّا مدينة
وبإسم الدين بِنْمَجِّدْ بعض
وبإسم الدنيا نبيع أسامينا
علشان نجمع ده على ده
وللا نحافظ على كراسينا
كل كراسي الدنيا تزول
واللي هيفضل دايما لينا
إن اللي بيجمعنا أكبر
من شياطين هنا حوالينا
وأكبر حتى من مطامعنا
وم الأخطاء اللي تغطينا
لأن الغالية إللي بتجمعنا
إسمها مصر . بهية . أمينة
حافظوا عليها زي ما هِيَّ
المحروسة أحلى عروسة
نعمة نشيلها فْي نن عنينا