يا ولاد بلدى

عندى سؤال كده بالبلدى
إيه دلوقتى اتغير فينا؟
ليه ما بقاش فيه حاجة تِرضينا؟
ليه اتفرقنا فُراق غَرَّقْنَا؟
وحتى يِغَرَّقْ ألف سفينة
ليه ورا ليه بسألها لنفسى
وبسأل سامح وأسأل مينا
وأسأل طه محمود ومحمد
اللى اتسموا باسم نبينا
.......................
وأسأل حتى الأرض الصحرا
وأسأل حتى رملة سينا
وأسأل أرض الريف الخضرا
اللى بخيرها مزروعة فينا
وأسأل شمس بلادى الطاهرة
فى عز الشتا طالعة تدفينا
وأسأل نيل عايشين على خيره
ونبعه الصافى اللى بيروينا
وأسأل حتى قناة محفورة
بدم أجدادنا عشان تِدِّينا
والبحرين لما بْيِبْكُوا
من أعمالنا ومن بلاوينا
كل دا لو ما بْيِجْمَعْ بيننا
هنجيب إيه تانى يِجْمَعْنَا
وللا منين سما هتغطينا
.....................
إيه غيرنا وإيه فَرَّقْنَا؟
وإيه خلانا ننسى ماضينا؟
هى الثورة عشان نتفرق
ولا نكون كلنا إيد واحدة؟
نحط إيدينا فى إيد بعضينا
إزاى مطامعنا تِفَرَّقْ بينا
وتيجى تِضَيَّعْ أحلى ما فينا؟
عشنا سنيننا بِنقْسِمْ لُقمة
ونِقْسِمْ نسمة هواء تحيينا
وعِشْنَا نقول عالوحدة حياتنا
وكانت الفرقة أعدى أْعَادينا
...................
ألف خسارة لَمِّا فى لحظة
بننسى الغالية وبأنانية
تزيد مآسيها مع مآسينا
ودم يسيل عالأرض الطاهرة
وسط مظاهرة
كأن دمانا رخيصة علينا
محروق كل مطامع الدنيا
على مناصبها اللى تخلينا
نقتل بعض وناكل بعض
ونحرق قرية ويَّا مدينة
وباسم الدين بِنْمَجِّدْ بعض
وباسم الدنيا نبيع أسامينا
علشان نجمع ده على ده
وللا نحافظ على كراسينا
كل كراسى الدنيا تزول
واللى هيفضل دايما لينا
إن اللى بيجمعنا أكبر
من شياطين هنا حوالينا
وأكبر حتى من مطامعنا
وم الأخطاء اللى تغطينا
لأن الغالية إللى بتجمعنا
اسمها مصر. بهية. أمينة
حافظوا عليها زى ما هِى
المحروسة أحلى عروسة
نعمة نشيلها فْى نن عنينا