تصريحات مثيرة لمحمد منير في أول ظهور له بعد أزمته الصحية: هاتجوز تاني وبسمع أغاني المهرجانات

تصريحات مثيرة أطلقها النجم الكبير محمد منير في أول ظهور له بعد أزمته الصحية الأخيرة، كشف فيها إقباله على الزواج مرة أخرى، وما يفكر فيه خلال الأيام القادمة من أغاني.

في البداية قال منير "أنا معرفش أعيش من غير حب، كل يوم بعيش قصة حب، لأن الحب بيعملنا حاجات كتيرة وبيعلمنا الفضيلة والنبل في حياتنا".

وأضاف: "الحب بيعلمنى كمان أختار أغنية حلوة، وأنا لا يعنينى غير إنى أصنع أغنية حلوة، وأنا بحب كل الأغانى التى قدمتها، وطالما الأغنية اتصدرت للناس وبقت مباحة لهم بتنقطع علاقتى بيهم".

وتابع : "أنا بنسى المرأة في وجود الموسيقى، ودى الحاجة الوحيدة اللى بتنسينى لأنى أسير المزيكا ولو حد عاوز يكسبنى يدينى مزيكا، وأنا عن نفسى كنت محظوظ عاطفيا واسألوهم هما ليه مش محظوظين معايا".

واستكمل: "أنا بتنفس الحب ودايما عطائى بيستمر بالحب، وحصل كتير في حياتى إنى حبيت ولكن مقدرش أعلن ده تقدير لها واحتراما لها، لأن المرأة هى أختى وأمى وصاحبتى، واتزوجت مرة وحيدة وعدت، وهتجوز تانى عادى".

وعن تاريخ الأغنية المصرية ومستواها قال: "لو رجعنا بالزمن بالتاريخ المصرى إلى سنة 1918 هتلاقى كان في أغانى فيها هبوط في كلماتها، وهتلاقى كل قرن من الزمان بيكون في نهضة كبيرة في الغناء في مصر بشكل خاص والفن بشكل عام، عشان كدة أنا من أكثر المتفائلين بالأغنية المصرية لأن نجاح الأغنية هو نجاح لكل الشعب المصرى، والأغنية المصرية تحديدا هي اللى ربطانا بكل العالم العربى".


وتابع الكينج محمد منير: "نهضة المزيكا والغناء في مصر شيء مهم بالنسبة لنا، وبالنسبة ليا لأن على المستوى الشخصى تربيت على كلمات عدد من الشعراء العظماء في الكلمة والألحان، وأنا غنيت لكمال الطويل وعباقرة مصر، فأنا عندى حتة تفاؤل جدا، ومتقوليش ليه، وعندى تفاؤل أيضا بكل مستقبل زملائي وكلهم عند نفس الحماس أيضا".

وعن أكثر الألقاب المحببة له والتى يفضلها قال الكينج محمد منير: "هو لقب محمد منير اللى بسمعها من كل الملايين، ودايما لما اللقب مش أنت اللى بتصنعه بيبقى أجمل وواقعى وبيكون أثره جميل، والجمهور هو اللى أطلقها عليا ومقدرش أقولهم لأ، وكل الألقاب سواء الكينج أو الملك أنا فخور بيها ومقدرش أنكر ده على نفسى".

وتحدث الكينج محمد منير عن ألبومه الجديد قائلا: "ألبومى واخد شكل جديد فعلا، ولكن أنا معرفش مين بيوجهنى ولكن الناس محتاجة تسمع مزيكا جديدة وأغنية جديدة، وبحاول أعمل أغنية حلوة في كلامها ولحنها، وأنا متجه للشكل الجديد دايما لأنى بحب التغيير وعطائى للفن دايما ومقدرش أكون أسير مدرسة واحدة".

وعن رأيه في المهرجانات الشعبية قال الكينج محمد منير: "الفن عمره ما كان في حاجة وحشة، ولكن في فن ضعيف وفى فن قوى، وأنا أتمنى أن كل زملائى يقدموا أغنية قوية في مضمونها وكلماتها وألحانها، لكن موضوع المسميات مهرجانات أو غيره مش هيفرق لأن اللى يهمنى إن أحب الأغنية وأقدر أسمعها".

وتابع الكينج محمد منير: "الفن متعدد الهوايات، وفي فن بينعشك وفي فن بيسلى وفى فن له مضمون، وكلها مطلوبة وكل الاختيارات متاحة قدام الجمهور، المهم مزاج الناس رايح لفين وقتها وأنا أسير لكل نوعيات الأغانى".

وعن اتجاه الكينج محمد منير لطرح الألبوم الجديد على طريقة السنجل مثل باقى المطربين قال: "ده قانون صناعة المزيكا لأن المنتج الذى أنتج وصرف فلوسه محتاج يعوضها تانى وبزيادة، ودى تكنولوجيا موجودة على مستوى العالم كله، وارتباطى بالسفر إلى أوروبا باستمرار خلانى أعرف نجوم عالميين كتير، والعالم كله بيستخدم الطريقة دى واحنا لازم نواكب العصر ونرضى بيه مها كانت مسمياته".

وعن منافسه في مجال الغناء قال: "أنا بنافس نفسى بس، أما الألتراس فهم شيء مهم جدا في حياتى، وبعمل حسابهم قبل ما أعمل أي حاجة عشان أشوف هيرضيهم ولا مش هيرضيهم".

وأضاف الكينج محمد مني: "الناس بتحبنى لأنى بتعامل بروح طيبة مع كل الناس ومعنديش سوء نية فلازم ألاقى المقابل، وأنا بسمع الأغنية الحلوة وكل الموجودين نجومى المفضلين ولكن الأهم بالنسبة ليا هي الأغنية الحلوة هي اللى بتكون مفضلة ليا".

وعن مشروع ميدلى لأم كلثوم، قال الكينج محمد منير: "إن شاء الله هعمل المشروع ده والفكرة قدامى، ولما ألاقى التكوينة دى لأن عمل أغانى كوكب الشرف السيدة أم كلثوم دى مشكلة كبير لأى مطرب مهما كان هو إيه لأنها اسم كبير وكلنا بنفخر بأن من بلدنا أم كلثوم ودى حاجة تقلق أي مطرب، وهو حلم بالنسبة ليا بأنى أقدر أجمع تكوينة حلوة ترضى كل الأذواق ويكون كلامها جميل ومتاح لما أقوله على طريقتى".

وعن قراره بتكرار تجربة التمثيل مرة أخرى قال الكينج: "معنديش مشكلة إنى أكرر تجربة التمثيل دلوقتى لو لقيت الظروف اللى تعمل ده، ولكن مفيش يوسف شاهين تانى وكل العظماء اللى اتعاملت معاهم مش متوفرين الأيام دى ولكن أنا على استعداد إنى أخوض تجربة التمثيل عادى".

وبسؤاله عمن يلقى اللوم والعتاب عليه قال الكينج محمد منير: "ألوم كل فنان بينقى أغنية سطحية المعنى وضعيفة في لحنها وكلماتها، وضعيف شكلا وموضوعا في مظهره، وده اللى يؤلمنى جدا وأتمنى لهم كلهم التوفيق يا رب".

وعن تكريمه من اليوم السابع قال الكينج محمد منير: "أنتوا غمرتونى بكرمكم، وأنا لا أستطيع أن أخفى على أحد أن الكاتب الصحفى خالد صلاح من أهم أصدقائى المقربين لي، وبحبه جدا وبحب كل أسرة تحرير الفن بالذات، وتكريمى ده أعطانى شعور إنى لسه بتنفس حب الناس، ولا يهمنى ضخامة المؤسسة على قدر ما يهمنى الأفراد اللى فيها فلازم يكون العطاء متبادل".

واختتم الكينج محمد منير حديثه قائلا: "أنا تعرضت لمحنة صحية خلال الفترة الأخيرة وده بيحصل لكل حد في الحياة، بس الحمد لله بفضل ربنا سبحانه وتعالى أولا وأخيرا وبدعواتكم، بقت صحتى زى البومب وهاتجوز قريب ان شاء الله".