القصة كاملة لتحويل المكس إلى فينيسيا الإسكندرية.. الأهالي ترفض ترك منازلهم ويؤكدون: مشكلتنا في المياه.. والمحافظ: الانتهاء من المشروع في أقرب وقت (صور)

تقع منطقة المكس أو فينيسيا الإسكندرية، كما يطلق عليها الأهالي بحي العجمي وهي ميناء قديم يطل على البحر الأبيض المتوسط ويمتهن أهالي المكس مهنة صيد الأسماك وقد توارثها أبا عن جد.
ومن النظرة الأولى إلى المنطقة تجد مراكب الصيد الكبيرة والصغيرة مرصوصة على جانبي ترعة المحمودية العذبة التي تصب في مياه البحر المتوسط بجوار منازل الصيادين.
ومع قرب الانتهاء من مشروع مساكن طلمبات المكس وتسليمه ونقل الأهالي للقضاء على العشوائيات اختلف الأهالي بين موافق ورافض ترك منزله وذكرياته والانتقال إلى الشقة الجديدة وقد رصدت "صوت الأمة" رأى أهالي المكس ومشاكلهم.
وقال فرج أنس أحد محاربين أكتوبر ومن أهالي المنطقة، إن مشكلة المنطقة منذ أكثر من عشرين عام تتلخص في صرف شركات البترول في مياه ترعة المحمودية العذبة وصرف الشركات «ده كله مواد كيميائية في أربع أطفال ماتوا بسبب المياه وغيرهم عندهم تشوهات».
وأضاف فرج أنس «حتى السمك مات من صرف الشركات البترولية بسبب السموم الموجودة في مياه الصرف وأساس أهالي المنطقة الصيد والمياه خلاص مش نافعه أغلب السمك مات، وتسأل لماذا أصحاب الشركات دي ميعملوش محطة تنقية أو تحويله للمواسير دى علشان الصيادين تعرف تصطاد».
وأشار إلى أن مشكلة المياه أكبر من مشكلة نقل الصيادين للمساكن «الصياد غلبان ممكن ينام في المركب أو في أي مكان لكن بيته الحقيقة ورزقه في البحر إلى بيصطاد منه ياريت يكون في حل لمشكلة الصرف الخاص بشركات البترول علشان يعرف يعيش».
وقد أبدى الريس "حته" أحد أهالي المكس وأقدم الصيادين ومندوب عنهم عن غضبه عن إهمال الدولة لهذه المنطقة وبالأخص الصيادين ومهنة الصيد وقال في أول حديثه المنطقة كلها مشاكل وأهم مشاكلنا الرخص الخاص بالصيد ومواعيد الصيد المفروض "إني اطلع البحر من قبل الفجر لكن ده مش بيحصل بيقفلوا البوابات لحد الساعة 8 صباحا طب أنا اصطاد أمته مش علشان مجموعة صغيرة تغلط تحاسب الكل".
وأضاف " حته " أن المسئولين قالوا هنعمل ميناء للصيادين وناخد البيوت دى وتاخدوا شقه مكانها " وسأل حته هل يعقل إنك تأخد مني بيت ثلاث أدوار وتديني شقة 54 متر إزاي ولما سألت أزاي قالوا هتاخد شقتين وأنا معايا الاتنين متجوزين كل واحد في دور وأنا في الأرضى هنعيش إزاى".
واستكمل " حته " حديثه قائلا أما النواب إلى احنا انتخبناهم معملوش حاجة، والنائب مصطفى الطلخاوى جه فى الاول وقال كل حاجة هتتحل وكان هنا قريب جدا ولم يفعل شئ احنا انتخبناهم على الفاضي وانا أرفض نقلي إلى أى مكان آخر وأغلب الصيادين رفضه.
وقال محمد جابر أحد الشباب الصيادين بمنطقة المكس احنا خلاص تعبنا مش عارفين نعمل ايه كل شويه ممنوع الصيد أو فتح البوابات الساعة 8 صباحا طب اعمل ايه نسرق ولا نبيع مخدرات وفى الحالتين هتحبس.
وأضاف "جابر " مياه الترعة والبحر مش كويسه بسبب مياه الصرف الخاصة بشركات البترول والصيد ده مهنتنا ومش بنعرف نعمل حاجة تانية واحنا أكثر من 4 آلاف صياد.
وقال أحمد عطية أن على باب الله ومعايا 5 اطفال وامهم والمشكلة انى ممكن نشتغل يوم ويوم لا بسبب المنع المفروض انى ف رخص صيد وقالوا اعملوا رخص وبعد كده يمنعون من الصيد طب هناكل منين وهنشرب منين انا معرفتش اجيب ملابس العيد للأطفال علشان منعوا الصيد قبل العيد بحوالى أسبوع ومش عارف اعمل ايه.
وأضافت إحدى سيدات المنطقة " الحمدلله ان احنا هنروح شقة ادميه، والشتا اللى فات غرقنا والمنازل فى بعض منها أسقف خشب فا تغرق من الامطار" وغير طبعا مفيش مياه نظيفة ومفيش صرف والغرف صغيره جدا.
وقالت الحاجة أم محمود أنا مولوده هنا بس مشروع التطوير الجديد حاجة جميلة جدا المنازل هنا أغلبها قوارض "فئران" والشقق الجديدة مش بعيدة المسافة بين المساكن والبحر أقل من 500 متر.
والجدير بالذكر أن مشروع تطوير طلمبات المكس، وهو أحد المشروعات الخاصة بتطوير المناطق العشوائية بمحافظة الإسكندرية حيث يتضمن المشروع 9 عقارات تحتوي على 215 وحدة سكنية وتبلغ مساحة الوحدة 54 متر، وهو مخصص لنقل سكان منطقة الصيادين العشوائية والواقعة على ترعة الخندق بالماكس.
وقد شدد الدكتور محمد سلطان محافظ الإسكندرية فى تصريحات صحفية على المسئولين عن أعمال التنفيذ في المساكن بالالتزام من الانتهاء من أعمال التشطيبات النهائية للعقارات والوحدات السكنية في وقتها المحدد، والعمل بأقصى جهد ممكن لنقل سكان منطقة طلمبات، والتي تمثل خطورة داهمة من الدرجة الثانية على سكانها.
وأكد سلطان على سرعة تسليم الأعمال لمستحقيها خلال الأشهر القادمة، مؤكدًا أن الدولة وقيادتها السياسية تضع في أولى اهتماماتها تطوير المناطق العشوائية في جميع أنحاء الجمهورية وتحسين معيشة قاطنيها.








اقرأ أيضا..

مرور الإسكندرية تحرر 1937 مخالفة متنوعة في 24 ساعة