طلاب كلية إعلام لمحمد صبحى : فيه مشكلة

صدق أو لا تصدق بعدما انتقد الفنان محمد صبحى البرامج والمسرحيات الكوميدية الساخرة الآن يطل على الشاشة ببرنامج كوميدى ساخر بعنوان «أعزائى المشاهدين.. مفيش مشكلة خالص» عبر قناة «cbc».
صبحى وبمجرد ظهوره فى الحلقة الأولى التى أُذعيت يوم السبت الماضى انقسم المتفرجون حوله إلى فريقين، الأول يرى أن البرنامج أكثر من جيد، فيما هاجم الفريق الثانى التجربة، مؤكدا أنها تعانى الكثير من المشاكل، ولذلك توجهنا بالسؤال للشباب عن رأيهم فى البرنامج ومدى تقليده لبرامج باسم يوسف وأبلة فاهيتا؟
«محمد صبحى وقع من نظرى» كانت هذه أولى الكلمات التى سمعناها من أحمد المدنى طالب كلية الإعلام بجامعة القاهرة، والذى أضاف: «صبحى مش راجل هلاس، وده برنامج كله هلس فى هلس، ومينفعش بعد ما كان محمد صبحى مربى أجيال وقامه كبيرة قدامنا يعمل فى نفسه كده علشان يتماشى مع لغة الشباب، لأن أكيد فيه لغة تانية غير اللغة دى ممكن يستخدمها، وأنا كنت بحبه جدا واستنيته مخصوص، لكن بعد ما شفته رأيى تغير فيه بالسلب 180 درجة، وهو شخص مالوش علاقة ببرامج فاهيتا وباسم يوسف، لأن دول نوع وصبحى نوعية تانية خالص، أنا أقبل ده منهم لكن من صبحى لا».
كلام أحمد كان عكس ما قالته ريم إبراهيم زميلته بالكلية، واللى أبدت إعجابها الشديد بالبرنامج، وقالت إنها طوال البرنامج كانت «ميتة على نفسها من الضحك» وأضافت: «عجبنى البرنامج جدا لأنه كان بيتكلم بتلقائية شديدة، ورغم أنه قال حاجات اتقالت فى برامج كتير قبل كده، بس حبيتها منه برده بسبب تلقائيته وخفة دمه اللى احنا دايما متعودين عليها، ومينفعش خالص أننا نقارنه بباسم يوسف لأن باسم فى مكانه مفيش حد يقدر يقرب لها مهما كان مين ومهما كنت بحب صبحى الصراحة، وكمان فاهيتا نوعية برنامجها مختلفة عن صبحى.
أما روضة عبدالناصر الطالبة فى تجارة إنجلش فكان أول تعليق لها «كان fake أووى»، وعلى الرغم من حبها لمحمد صبحى واصلت قائلة: «تابعت البرنامج لأننى أحب محمد صبحى، بس حسيته بيأفور فى الأداء والتمثيل علشان يقدر يضحك الناس، بس بردو مش هبطل أتابعه، وهتابعه من باب الفضول علشان أعرف إيه الجديد اللى هيحصل فى البرنامج، وهو محتاج جدا أنه يجدد ويضيف حاجة مختلفة، لأن اللى بيعمله تقليد، لكن الحقيقة مينفعش يتقارن بباسم يوسف، باسم يوسف مفيش حد ينفع يتقارن بيه».
«صبحى مش كوميدية ساخرة» بهذه الجملة لخصت آية ممدوح الطالبة بكلية الإعلام حالة الجدل حول البرنامج قبل أن تضيف: «أنا شوفت البرنامج وحبيته لأن محمد صبحى رجل اتربينا على أعماله، وأنا شفت أنه فى البرنامج كان عنده جرأة فى الموضوعات اللى ناقشها، والأهم من كده أنه مؤمن بالموضوع اللى بيطرحه وبيعتبره قضيته وملم بكل تفاصيل الموضوع ده وشخص عنده ثقافة ووعى، ومينفعش أننا نقارنه ببرامج تانية، لأن صبحى مبيقدمش عمره كوميديا ساخرة فقط، ولكنه بيتناول الموضوعات وبيناقشها وبيعرض رأيه فيها باحترام، يعنى كوميدى وفى نفس الوقت باحترام هو ده ستايل محمد صبحى».
أما سمر مهنى فاتخذت موقفا وسطيا، وقالت: بالرغم من حبى له وأننى كنت من متابعى ونيس، وأننى كنت مستنية أشوف صبحى بعد الغياب ده كله هيعمل إيه إلا أنى شفت أن البرنامج لطيف لا حلو ولا وحش، هو برنامج محترم بيناقش الموضوعات بطريقة راقية ومحترمة، وهيبقى ليه جمهوره هو مش كتير بس ليه جمهوره.
وأضافت ماريا مجدى: «محمد صبحى أى حاجة بيقدمها بتكون فى سبيل إصلاح المجتمع، فلازم نحبها، ولازم تكون حلوة، لأنه مبيقدمش حاجة فى الهوا، كل حاجة وليها رسالة، وأنا مستغربة من الناس اللى بتقول إن البرنامج دمه تقيل وصبحى معروف أنه كتلة كوميدية متحركة على الأرض لو كح هنضحك».
أما آن جمال فقالت: «ده تقليد سخيف لباسم يوسف، دى كانت أول جملة قلتها بعد ما شفت الحلقة، رغم أننى أحب صبحى وأحترمه، بس أنا شايفة أنه يكتفى بالمسرح أحسن، لأنه أقيم وأليق بصبحى، وكنا بنحبه فيه، لكن إنه يطلع يقلد باسم يوسف، ده مش حلو، لأن باسم فى مكانة بالنسبة للناس مفيش حد هيقدر حتى يتقارن بيه، والنوع ده من البرامج كتر أوى وبقى سخيف».