في دايرة الرحلة (7) : 4 اختيارات مختلفة ومجنونة للإقامة في السفر !

اتكلمنا في مقالين سابقين عن اختيارات الإقامة في السفر، أحدهم عام ل«الإقامة فائقة الرخص» والتاني كان لاختيار أعلى شوية أحيانا وكنت بفضله «للفتيات والمتزوجين»، إيه رأيك في إني اديك اختيارات مختلفة ومجنونة؟ إيه رأيك مثلا تقيم وانت مسافر في معبد مع كهنة الزن أو دير؟!
جديدة دي صح؟
تعالى شوف 4 اختيارات مجنونة ومبتكرة وجديدة للإقامة وانت مسافر..
اقعد في مزرعة !
تعرف إنك ممكن تقعد في مزرعة؟! الإقامة دي مشهورة باسم الFarm stay أو Agritourism، فكره لطيفة ومختلفة خاصة لو قاعد في بلد من المشتهرين بالريف زي أيرلندا أو ريف انجلترا أو استراليا مثلا...
التكلفة بتختلف، فيه أماكن بتكون تكاليفها قليلة في حدود ال30 يورو في اليوم مثلا، وفيه بقى لو في بيت مزرعة ضخم زي اللي في الفيديو السابق بتكون تكلفته كبيره شوية لكن لو مجموعة مسافرة سوا ممكن التكلفة تبقى كويسة...
وفيه مساحة تنوع كبيرة من اول إنك باختصار رايح تتنفخ وتعيش حياة ريف حقيقية وتخوض التجربة كاملة وبين بيوت ريفية بحمام سباحة واسطبل وحياة غنية يعني هدفها الاستجمام وكدا، بس طبعا بتكلفة أكبر...
مفيش مواقع محددة مشهورة وثقيلة في هذا المجال، فلما تحب دور على farmhouse أو farm stay واكتب اسم البلد، وممكن تلاقي على booking.com على فكرة والتالي مجموعة من أشهر المواقع للنوع ده من الإقامة (جرب ايطاليا واسبانيا، هتشوف بيوت جميلة حقيقي) :
Farm Stay UK
Farm Stay Accommodation
Farm Stay US
Farm Stay Australia
Website for farm stay search worlwide
***
تبحث عن السلام النفسي؟ اقعد في دير/معبد...
تعرف إنك ممكن تقعد في دير في إيطاليا؟ أو معبد بوذي في كوريا؟ أو حتى معبد شنوكين في اليابان؟ معبد كبادوكي في تركيا، أو تقيم يومين مع رهبان الزن في الصين وتايوان؟
فاكر جوليا روبرتس في Eat pray love كانت قاعدة فين في الهند؟.. هو دا بقى !
خاصةً إيطاليا مليانة بأماكن زي دي وأحيانا بمستوى رفاهية غريب، ودا موقع شهير جدا للاقامة في المعابد والأديرة أو ما يسمى بال Monastery Stays في إيطاليا.
ودا موقع تاني فيه مجموعة من الأديرة والمعابد اللي فاتحة الإقامة حول العالم.
ودا موقع لمعابد في كوريا، ودا بلوج لطيف لبعض المعابد والأديرة في أوروبا.
والإقامة في المعابد دي غير إنها تجربة جديدة وadventurous أرخص حتى من الهوستلز وممكن أصلا تكون مبنية على التبرع أو في حدود 10-20 يورو في اليوم مثلا...
بس لازم تبقى عارف طبعا انك مش في أوتيل، الصوت لازم يبقى واطي والمكان هادي جدا –وتقريبا ده هيخليني عمري ما هقدر أروح جرب لإن بنسبة كبيرة هيطردوني بسبب صوتي العالي- ممكن جدًا يكون مفيش تلفزيون أصلا او انترنت، وأغلبهم بيبقى فيه curfew بالليل في أوقات معينة، دا غير إن مش كلهم بيسمحوا بوجود ستات أصلا، حسب المكان نفسه فشوفوا التفاصيل كويس قبل ما تحجزوا...
ودا تقرير لطيف عن 15 معبد/دير رائعي الجمال للإقامة حول العالم.
***
بدل بيتك مع حد تاني !
فكرة مختلفة عن المين ستريم –ولو انها بدأت برده تنتشر دلوقتي! – هي الHome exchange !، تبديل البيوت، تسافر أسبانيا مثلا وتاخد بيت عائلة ما لمدة أسبوع مقابل إنهم يقيموا في بيتك، طبعا دا مناسب أكتر للناس الأكبر في السن أو العائلات، اللي عندهم بيوت أو شقق من الأساس...
بس فكره جديدة ومختلفة ورخيصة للإقامة وانت مسافر!، ببلاش تماما، استبدال رأس برأس، وقصاد دا هتاخد راحة الإقامة في بيت!.
طبعا فكره مقلقة أو مخيفة لبعض الناس عشان الأمن، لكن افتكر إن هو كمان سايبلك بيته يعني، وأغلب المواقع دي فيها درجات متعددة من الأمن والتأكد من الشخصيات برده –بس طبعا المخاطرة مش صفر يعني- وممكن تفضل تتكلم وتتناقش مع الشخص قبل ما توافق على التبديل لغاية ما ترتاح مفيش أي التزامات...
لو عايز تعرف أكتر عن الموضوع دا شوف Home Exchange، الموقع دا ظهر في فيلم The holiday اللي بتدور أحداثه أصلا عن عائلتين عملوا تبادل بيوت وساهم في شهرة الفكره جدا..
وفيه مواقع تانية معروفة زي HomeSwap وLove Home Swap برده..
لو الفكره بالنسبة لك مقلقة برده فيه بديل لطيف.
***
خد بالك من بيت حد تاني وهو مسافر Home – Sitting
ممكن لو مش عايز تبدل بيتك –أو معندكش بيت تبدله – تقيم في بيت حد مسافر مقابل العناية ببيته وهو مش موجود!
إقامة مجانية مقابل مجهود بسيط!
وفيه مواقع عديدة بتوفر التنظيم للخدمة دي زي Mind My House, House Carers, Luxury House Sitting
دي كانت شوية أفكار مجنونة ومبتكرة ورخيصة لو عايز تجرب حاجه جديدة، وبالمناسبة، دي مش (كل) الوسائل المبتكرة اللي ممكن تجربها للإقامة وانت مسافر، ممكن مثلا –بس دي غالية يعني- تأجر قلعة !
ولكن تلك مغامرة أخرى ..
***
تابعوني على تويتر:
http://www.twitter.com/NourEldin_z3r0
تابعوني على فيسبوك:
http://www.facebook.com/ze3r0