حادثة قتل

في يوم خطرت لي فكرة
عاقلة؟ ... يمكن!
ويمكن كمان مجنونة
إني أكسّر قيدي
واصرخ بعلو الصوت
يا ناس الرحمة!
لقيت صوتي موش طالع
موش سامع حتى نفسي
ورجعت لنفسي
مهزوم .. مكسور
وقعدت أفكر
موش لازم أصرّخ
ممكن أهمس
همس يوصل
من قلب لقلب
وهمست
الرحمة
العدل
يا أهل
الحل وكمان العقد
مين سمعني؟
ما فيش حد
لا حد سمعني
ولا جاني رد
أهل الحل
وأهل العقد
انشغلوا بقمة قيد العقد
ومؤتمر لوضع حد
لحالة الهمس
وراح صوتي
ولْزمت الصمت
أنا قلت لنفسي
وفجأة ..
جاني صوت
من غير صوت
لقيت قلب
من غير قلب
يسمع همس
من غير همس
يا اللا ..
قول وعلّي الصوت
فوق .. فوق
قول للعالم
يا اللا فُوق
أنا موجود ..؟
ولا موش موجود؟
حد يقول لي ..
ورد الهمس
ومن جو القلب
سمعت أنين
يا مسكين
بتعمل إيه
إنت فكرك
حد هيسمع
إنت تعرف
إنت مين؟
أنت تعرف
هُمّا مين؟
إياك تنسى أنت فين
وهُمّا فين
اصحى وفُوق
وانزل من فوق
من أحلامك
انزل ع الأرض
وقلت لنفسي ..
(كلمة جديدة!
أول مرة أكلم نفسي
أنا عمري ما عرفت نفسي)
كانوا قالو لي زمان
مات الرجال
كلتهم نار الحرب
من أكثر من خمسة وتلاتين عام
مسكت بطاقتي
وقريتها
لقيت (ذكر)
هي كلمة .. ؟
ولا صفة ..؟
يعني ذكر تعني راجل
ولا أنا ما بقيتشي راجل؟
قلت أشوف
وقلت لنفسي مرة كمان
يا اللا بينا نسأل يا زمان ..
قول يا زمان
حتى الزمان ما رد جواب
ولا قال كلمة
ولا همسة بعت لي
ودخلت مع نفسي
جو جلدي
وقلت كفاية
أول مرة أقول الكلمة
كفاية .. كفاية ..
وألف كفاية
وسمعت همس
يقول كفاية
وسمعت زعيق
يقول كفاية
كان (النظام)
هو اللي يقول
وفجأة..
عرفت نفسي
أنا ليّ صوت
وليّ كيان
يخاف منه
حتى (النظام)
وعرفت الدرس
إنْ الهمس
لما يكون طالع م القلب
من قلب جرئ
يخاف منه
اللي عمري ما كنت أتصور
إنّو يخاف
أو حتى يعرف
كلمة خوف
وهيلا هُبّا
جيبت السكين
كنت عايز .....
أنا كنت عايز ..
وفجأة سمعت
صريخ
وزعيق
وضجيج
(النظام) صرّخ ف الكون
المجنون دا هيعمل إيه
هو اتجنن؟
حد يقتل (النظام)
وكأني أول مرة سمعت الكلمة
(يقتل) ..!
رددت الكلمة
كمان وكمان
لما قلبي بقى جوايا
جامد ما تقولش زي الجبال
وبالسكين...
مرفوع عالي ..
ورحت نازل بعزم ما فيّه
وقتلت ...
قتلت خوفي
وبعلو الصوت
صرخت
أنا حر
أنا حر
بصيت فجأة
لقيت (النظام)
ذليل .. جيان
بيقول
يا إنسان!
ولأول مرة
كأني أسمع
كلمة إنسان
أنا عمري ما حسيت الكلمة
كنت دايماً خوفي قاتلني
محسسني إني عمري
ما كنتش أبداً
ف يوم إنسان
لكن لما سمعت الكلمة..
(يا إنسان طلباتك إيه؟)
قال لي (النظام)
أنا قلت ما فيش
بس إني أكون إنسان!