ميدو عن رفضه تشجيع الأهلي: «مفيش حاجة تستاهل تكون كذاب ومنافق»

قدم أحمد حسام «ميدو»، نجم الزمالك السابق، اعتذاره لمن زعلوا منه بسبب توقيت تصريحاته بأنه لن يشجع الأهلي في كأس العالم للأندية، مؤكدا أنه ابن نادي الزمالك ولن يشجع في مصر أي نادي غير الفارس الأبيض.
قال ميدو عبر حسابه الرسمي على موقع التواصل الاجتماعي «إكس»:" أنا ابن الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي 9 سنين".
أضاف ميدو:" وانا عيل صغير كنت بروح ب فانلة الزمالك في المواصلات علشان الناس كلها تعرف إني ناشئ في الزمالك بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك".
تابع ميدو:" تتلمذت على يد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أيا كان بيلاعب مين ولكن في نفس الوقت اتربيت إني أحترم كل المنافسين وأهنيهم لو كسبوا وأباركلهم وأقولهم هارد لك لو خسروا، هو ده معنى الروح الرياضية بالنسبة لي!!".
أشار ميدو:" لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب لأن بكل بساطة مفيش حاجة في الدنيا تستاهل إنك تكون كذاب ومنافق!".
أوضح ميدو:" اتفق معاكم إن التوقيت ما كانش مناسب وبعتذر لأي حد زعل إني قلت الكلام ده في حدث مهم يخص النادي الأهلي وأنا شايف الناس اللي زعلت بخصوص إن الوقت مش مناسب عندهم كل الحق".
واصل ميدو:" أنا لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت".
تابع ميدو:" و بخصوص الهجوم اللي بتعرضله فأنا عاذر الناس لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الإعلام وهما أكتر ناس بيأذوا المنافس في الخفاء وأكتر ناس بتتمنى من قلبها خسارة المنافس من جواهم".
أكد:" مش هرد على أي حد هاجمني لأن بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش اكتر من كده!!".
أتم ميدو:" مره ثانية بعتذر إني كنت سبب في جدال قائم الأيام اللي فاتت للأسف مش ذنبي ولكن بسبب مدمنين الترند والدخلاء على كرة القدم اللي لا يمكن يفهموا أبدا عقلية مشجع الكورة!!".
انا ابن #الزمالك وأكبر فخر ليا في حياتي اني ابن المدرج ابن الثالثه يمين بلعب في الزمالك من وانا عندي 9 سنين وانا عيل صغير كنت بروح ب فانلة الزمالك في المواصلات علشان الناس كلها تعرف اني ناشئ في الزمالك بطاقتي وانا عيل صغير هي كارنيه اتحاد الكورة اللي مكتوب عليه اسم الزمالك..…
— Mido (@midoahm) December 9, 2024