بعد انتهاء عرضه.. تامر حبيب يشيد بمسلسل كامل العدد

أشاد السيناريست تامر حبيب بمسلسل "كامل العدد"، المكون من 15 حلقة وتم عرضه في النصف الأول من شهر رمضان، قائلا: "‏الشهادة هاتبقي مجروحة وأنا بتكلم عن (كامل العدد) علشان رنا أبو الريش ويسر طاهر دول بناتي، اختاروا نوعية وحدوتة علاقات وأحداث خفيفة، ايقنوا إننا كلنا فينا اللي مكفينا من أول ما نصحى لغاية ماننام، كان عندهم الجرأة والمجازفة في انهم يختاروا تيمة فيلم من الافلام اللي كلنا حافظينها ويعملولها معالجة مودرن مع أنهم يذكروا في التتر أن مسلسلهم مستوحى من (عالم عيال عيال).
وأضاف عبر حسابه الشخصي على إنستجرام، قائلا: "معالجة ذكية ومتكلمة في مشاكل حقيقية وكبيرة و تناولوها بخفة ظل مناسبة للنوعية اللي مقدمين بيها معالجتهم، ماحصلش ولا مرة ادعاء أو جعلصة، بالعكس، كتبوا عالم عيالهم هما الشخصي، من مشاهدات وعلاقات شافوها وعاشوها هما بنفسهم، وعشان كده المشاهد طلعت حياتية سلسة، وجه الجميل خالد الحلفاوي ببساطته وتعامل مع ورق بناتي من غير اي فذلكة، لتخرج المشاهد من تحت إيده زي كوباية المية، تروي عطشنا لشوية بهجة".
وتابع: "أما عن العيال، ولاد دينا وشريف، فأنا بجد بحيي اختيار خالد لكل واحد فيهم بدون استثناء وشغله علي آدائهم والهارموني بينهم، وده مش سهل علي فكرة. واسمحولي أخص بالذكر ابن دينا الكبير وبنت شريف الصغيرة، افتكروا إن الشاب الجميل اللي عمل ابن دينا ده لو فضل مركز وطبيعي وذكي هايبقي ممثل مهم علشان الراجل ده موهوب بجد وبيجبرك تصدقه وتركز معاه".
واوضح: "مصطفى درويش كان بالنسبة لي برضه مفاجأة سارة ومنعشة، طبيعي ومصدق جداً وعامل الشخصية بآداء كوميدي وحقيقي، مشاهد دينا مع الاولاد كلهم كانت جميلة ورايقة، بالذات لما تكون فيه مشكلة بجد، زي مشهد المواجهة بينها وبين بنتها لما عرفت انها عايزة تتجوز (البنت دي كمان كويسة جداً وبالذات في المشهد ده)".
واشار: "تركيبة علاقات العيلتين والمواقف بينهم وتطور علاقاتهم بعيد عن كليشيهات زوجة الاب اللي بتعذب عياله، وزوج الأم القاسي عديم القلب، ولا الحما اللي ابشع من العما، ولا المطلقين اللي مشحططين بعض في المحاكم، حسستني إن الدنيا لسة بخير، وإن لسه ينفع نشوف علاقات في الدراما عادية من غير جرايم ولا عفاريت، ينفع نشوف ناس بيتكلموا ويسمعوا بعض من غير ردح وصريخ واستعارات ملوية، ناس لما كانوا يتجمعوا في بيت الجد المريح للأعصاب ويتغدوا، يلعبوا ويقربوا من بعض، حسيت إني عايز أقضي معاهم اليوم الحلو ده، يا جماعة المرة الجاية أنا راشق، إعزموني معاكم، وماتقولوليش كامل العدد".