ميار الببلاوي: أحمد رزق قلبه أسود علشان مش راضي يصالحني

كشفت الفنانة ميار الببلاوي، تفاصيل الخلاف بينها وبين الفنان أحمد رزق، والذي استمر ل سنوات عديدة، مؤكدة إنها لما تقصد الإساءة مطلقًا وأن الأمر كله ما هو إلا سوء فهم.
وقالت ميار الببلاوي، خلال حوارها في برنامج قعدة ستات المذاع على قناة "القاهرة اليوم" ومن تقديم الإعلامية مروة صبري، : أنا عاتبت أحمد رزق وقُلت له إنت قلبك إسود يا أحمد مش بتصالحني ليه؟، والموضوع بدأ إني كنت في مرة بتطلق والوقت ده كان انفصال حنان مطاوع عن أحمد رزق بعد ما كانوا مخطوبين، فأنا لقيت واحدة منزلة صورة حنان وخطيبها وكاتبة عليها أتقل تاخد حاجة نضيفة، وأنا نشرت الصورة عندي من غير قصد، والله ما كنت أقصد أحمد وهو حبيب قلبي، وكان أول مرة يشتغل في حياته كان في مسلسل بتاعي كان لسة جديد.
وأضافت: أنا عارفة كويس إن مستحيل أغلط في أحمد، والصورة اللي نشرتها كان الغرض منها إني ألقح على الشخص اللي انفصلت عنه، ولكن الصحافيين خدوها وبعتوها ل أحمد رزق، وقالوا إني بقول عليه كده، وبعت لأحمد على الواتساب مردش عليا خالص، ولغاية دلوقتي مخاصمني.
واختتمت ميار الببلاوي حديثها قائلة: أنا مشكلتي فعلًا إن لساني متبري مني، وبتكلم باللي في قلبي جدًا وبفترض في اللي قدامي إنه يكون فاهم، وعمري ما كنت غلاطة حاشة لله، ومفيش بيني وبين أي حد من أصدقائي من الوسط الفني الجيل بتاع زمان ودلوقتي.