انتصار: اختلفت مع كاملة أبو ذكري في «بنت اسمها ذات» على مواعيد العمل.. ولولا زعقتلها كان هيحصل فركش

قالت الفنانة انتصار، إنها اختلفت مع المخرجة كاملة أبو زكري في مسلسل «بنت اسمها ذات»، بسبب مشكلة على مواعيد العمل، مشيرة إلى أنها تأخرت على العمل مدة 20 دقيقة في أحد أيام التصوير.
وأضافت، في لقاء ببرنامج «العرافة»، التي تقدمه بسمة وهبة عبر فضائية «المحور»، مساء اليوم الأربعاء، أن أي عمل لا يخلو من المشكلات، متابعة: «إحنا اختلفنا، رغم إننا ماشيين مع بعض كويس جدا طول أيام التصوير والعلاقة جيدة جدا».
وروت: «حصلت المشكلة إننا كان لازم نتجمع 5 ونصف الصبح أنا وباسم سمرة ونيللي كريم، وكنا بنجهز في مكتب يوسف شاهين في شارع شامبليون، فأنا ونيللي دخلنا عليها الساعة 6 إلا 10 دقايق، وباسم صبرة دخل عليها 6 و5 دقايق».
واستكملت: «سابتهم كلهم ومسكت فيا أنا وبتقول لي انت اتأخرتي، فملقتش بقى حد لقيتني واقفة لوحدي، فقلت لها تلت ساعة محصلش حاجة، قالتلي لا حصل فيها حاجات، وهي تعشق الفركش أوي، يعني تدور على سبب وتقول لك فركش فقلت هتيجي فيا أنا بقى ولا إيه»، لافتة إلى أن المخرجة كاملة أبو زكري كانت صديقتها وعملا معا قبل هذا المسلسل.
وأوضحت أن هذا الموقف حدث بينهما هما الاثنين فقط في شارع قصر النيل في تمام الساعة السادسة صباحًا في يوم الجمعة، مضيفة أن باقي زملائها اختفوا حينها: «لقيت نفسي لوحدي وبواجه الإخراج والتصوير والإنتاج، لوكيشن كامل تترأسه المخرجة».
وتابعت: «شيلت الليلة واتكلمت وقلت لا مفيش حاجة حصلت، أصل تلت ساعة في عمر يوم تصوير إيه يعني، وده تأخير بسبب خطأ ميكانيكي متعرفيش تسيطري عليه، لكن محصلش فركش، ولولا إن زعقت في المخرجة كان هيحصل».
وردت على حديث «العرافة» حول إنكار المخرجة كاملة أبو زكري مجهودها في المسلسل، رغم إشادتها بباقي الممثلين في العمل، قائلة: «الجمهور والدنيا كلها لغاية دلوقتي بتقول أنا فمش مهم لما يبقى فرد مقلش، أعمل إيه؟ أضربها على إيدها وأقول لها قولي! مش عاوزة تقول نعملها إيه».